सोनगीर : विधवा प्रथा बंद करण्याचा हेरवाड (जि. कोल्हापूर) ग्रामपंचायतीने घेतलेला निर्णय निंभोरा (ता. अमळनेर) येथील ग्रामसभेनेही घेतला असून, तसा ठराव करून सर्वप्रथम या मोहिमेची सुरवात केली. मंगळवारी (ता. १) अहिल्याबाई होळकर जयंतीनिमित्त ग्रामसभेस मोठ्या संख्येने विधवा महिला उपस्थित होत्या. तेव्हा हा निर्णय घेण्यात आला. एवढेच नव्हे, तर विधवा महिलांच्या हस्ते अहिल्याबाई होळकर यांच्या प्रतिमेचे पूजन झाले.

दर्शना पवार लिखित संघर्षमूर्ती अहिल्याआई या पुस्तकाचे लोकार्पण झाले. यासाठी सरपंच पायल पाटील यांनी आपल्या राजरथ फाउंडेशनतर्फे १११ पुस्तके उपलब्ध करून दिली. सरपंच पाटील यांनी अहिल्यादेवींचा आदर्श घेत आपणही आपल्या गावात विधवांना सन्मान व समानता मिळवून देऊ या. पतीच्या निधनानंतर पत्नीचे कुंकू पुसणे, गळ्यातील मंगळसूत्र तोडणे, हातातील बांगड्या फोडणे, पायातील जोडवे काढणे आदी चुकीच्या प्रथांना पायबंद घालून विधवांना धार्मिक व सामाजिक कार्यात अग्रस्थान देऊ, असे आवाहन केले.

कायद्याने प्रत्येक व्यक्तीला सन्मानाने जीवन जगण्याचा समान अधिकार आहे, म्हणूनच विधवांबाबतच्या अनिष्ट प्रथा बंद करण्याचा व प्रबोधन करण्याचा ठराव करण्यात आला.

उपसरपंच आलेश धनगर, माजी उपसरपंच समाधान धनगर, चंद्रकलाताई पाटील, सुनील पाटील, भाग्यश्री पाटील, कविता कोळी, जितू वाडेकर, सुभाष पारधी, संजय न्हाळदे, अनिल पाटील, दिलीप पाटील, तुषार पाटील, कपिल धनगर, ग्रामसेवक नितीन पाटील, रवींद्र पाटील, रतिलाल बाविस्कर आदींसह ग्रामस्थ व महिला मोठ्या संख्येने उपस्थित होत्या. या निर्णयामुळे महिलांमध्ये समाधान व्यक्त होत आहे.