वणी (नाशिक) : वणी व परिसरातील मंदिरांमध्ये शिव पार्वतीच्या मंत्रघोषात हरतालिका व्रत उत्साहात साजरे करण्यात आले. 
आज सकाळपासूनच विवाहित स्त्रियांबरोबर कुमारिकांनी आकर्षक वेशभुषा, शांगशृंगार करुन पुजेला जाण्याची लगबग सुरु होती. पार्वतीने हे व्रत करून शिवाला प्राप्त करून घेतले. या आख्यायिकेनुसार आपल्यालाही उत्कृष्ट पती मिळावा, यासाठी कुमारीकांनी तसेच लाभलेला पती दीर्घायुषी आणि आरोग्यवान होऊन आपल्यासाठी अनुकूल व्हावा यासाठी महिलांनी हे व्रत करीत असल्याचे सांगितले.

येथील अन्नपूर्णा सभामंडप, देवनदीवरील निळकंठेश्वर महादेव मंदीर, जगदंबा देवी मंदीर, शिंपी समाज मंगलकार्यालय, संताजी मंगल कार्यालय आदी ठिकाणी पुरोहितांच्या हस्ते पौरोहित्य करवून घेत त्यांच्याकडून हरतालिका व्रतामागची संकल्पना समजावून घेत कहाणीचे श्रवण केले. पूजेवेळी आरती, धूप, उदबत्ती यामुळे वातावरणात वेगळेच चैतन्य निर्माण झाले होते. हरतालिकेचा संपूर्ण दिवस उपवास करीत महिलांनी सायंकाळी उशीरा व्रताची सांगता करीत उपवास सोडला.