सडक अर्जुनी (जि. गोंदिया) : जिल्ह्यात गेल्या काही दिवसांपासून मुसळधार पाऊस सुरु आहे. त्यामुळे नदी- नाल्यांना प्रचंड पूर आला आहे. शेतातील छोटे नाले तर दुथडी भरून वाहत आहेत. त्यामुळे या नाल्यांना जीवघेणे स्वरूप प्राप्त झाले आहे. सडक अर्जुनी येथे अशाच दोन हृदयद्रावक घटना घडल्या आहेत.
शेतात गेलेल्या नातवंडांपैकी एका नातीचा नाल्यात बुडून मृत्यू झाला. आजोबाच्या लक्षात हा प्रकार वेळीच लक्षात आल्याने त्यांना नातवाला वाचविण्यात यश आले. ही घटना म्हसवानी येथे शनिवारी (ता. 15) दुपारी सव्वाबाराच्या सुमारास घडली.
कांचन शहारे तिचे दोन लहान भाऊ असे तिघेजण आपल्या आजोबांसोबत शेतात गेले होते. त्यांचे शेत नाल्याच्या किनाऱ्यावर आहे. आजोबा शेतातील गवत कापायला लागले. तेवढ्यात तिन्ही भावंडे जवळच्या नाल्यावर हातपाय धुण्यासाठी गेले. हातपाय धुताना बहीण व एक भाऊ नाल्यात बुडाले.
ही बाब लक्षात येताच तत्काळ आजोबा धावून आले. नातवाला किनाऱ्यावर बाहेर काढून ठेवले. पुन्हा नात कांचन हिला काढण्यासाठी गेले. परंतु, ती त्या जागेवर नव्हती. पाण्याच्या प्रवाहात वाहून गेली होती. दरम्यान, या घटनेची माहिती गावात पोहोचताच गावकऱ्यांनी घटनास्थळ गाठले. शोध घेतला असता ती बुडालेल्या स्थळापासून 50 फूट अंतरावर सापडली. मात्र, ती मृतावस्थेत होती. कांचन विश्‍वनाथ शहारे (वय 10, रा. म्हसवानी) असे मृताचे नाव आहे. या घटनेचा पुढील तपास ठाणेदार विजय पवार यांच्या मार्गदर्शनाखाली जमादार एच. सी. धावडे करीत आहेत.
वाहून गेलेली चप्पल काढण्याचा प्रयत्न करीत असताना एका मुलाचा नदीपात्रात बुडून मृत्यू झाला. ही घटना शनिवारी (ता. 15) सकाळी 11 च्या सुमारास फुलेनगर गावाशेजारी घडली. मनीष सुभाष तोरणकर (वय 14,रा. फुलेनगर) असे मृताचे नाव आहे.
डुग्गीपार पोलिसांनी दिलेल्या माहितीनुसार, मनीष तोरणकर हा आपल्या मित्रांसह गावाशेजारी असलेल्या नदीकडे फिरायला गेला होता. मनीषसह त्याच्या मित्रांनी नदीपात्रात हातपाय धुतले. याचवेळी मनीषची चप्पल वाहून गेली. त्यामुळे चप्पल काढण्यासाठी तो खोल पाण्यात गेला. यातच त्याचा बुडून मृत्यू झाला. मच्छीमारांच्या मदतीने मृतदेह बाहेर काढण्यात आला. पुढील तपास ठाणेदार विजय पवार यांच्या मार्गदर्शनाखाली बीट जमादार हरिश्‍चंद्र शेंडे करीत आहेत.
संपादन - अथर्व महांकाळ
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.