पथ्रोट : वाढदिवस साजरा करण्यासाठी जात असताना झालेल्या अपघातात सायंकाळी तरुणीचा अपघातात मृत्यू झाला. अपघाताची घटना परसापूर येथील ठोकबर्डा फाट्यावर बुधवारी (ता.२४) दुपारी १२ वाजेदरम्यान घडली.

वैष्णवी अर्जुन मस्करे (वय १७, रा. तेलंखडी, पथ्रोट), असे अपघातातील मृत तरुणीचे नाव आहे. येथील प्रेरणा संतोष लिल्हरे हिचा वाढदिवस साजरा करण्यासाठी अल्केश चक्रधर राऊत, प्रेरणा संतोष लिल्हरे (दोघे रा. तेलंखडी) व राजवीर गुलीचंद वर्मा (रा. नागपूर) हे एमएच २७ एएम १८१४ क्रमांकाच्या दुचाकीने, तर दुसऱ्या दुचाकीने पीयूष संतोष लिल्हरे, वैष्णवी अर्जुन मस्करे (दोघे रा. तेलंखडी), हिना गुलीचंद वर्मा असे सहाजण प्रेरणा हिचा वाढदिवस साजरा करण्यासाठी चिखलदऱ्याला जात होते.

ठोकबर्डा फाट्यानजीक विरुद्ध दिशेने येणाऱ्या एमएच ०२ एव्ही ९८१ क्रमांकाची कार व पीयूषच्या दुचाकीची धडक झाली. त्यात मागे बसलेली वैष्णवी मस्करेच्या डोक्यावरून मागील चाक गेल्याने गंभीर दुखापत झाली. तिला परतवाडा येथील खासगी रुग्णालयातून अमरावती येथे हलवीत असताना वाटेतच तिचा मृत्यू झाला.

पथ्रोट पोलिसांनी गुन्हा दाखल केला. सदर अपघाताच्या घटनेनंतर तेलंखडी परिसरात शोककळा पसरली असून सर्वत्र हळहळ व्यक्त होत आहे.