नागपूर - जिल्ह्यातील तुरळक ठिकाणी अवकाळी पावसाने हजेरी लावल्याने शेतकऱ्यांची चांगलीच तारांबळ उडाली. काही ठिकाणी गारपीट झाल्याची माहिती मिळाली आहे. कापणीवर असलेल्या गहू व हरभरा पिकाचे अवकाळीमुळे नुकसान झाले आहे. आंबिया बहरावर असलेल्या संत्रा व मोसंबीसाठीही पाऊस फायदेशीर ठरणार आहे.

रामटेक तालुक्‍यातील शिवनी भोंडकी, किरणापूर, भंडारबोडी, हसापूर, महादुला परिसरात पहाटे साडेतीनच्या सुमारास अचानक विजेच्या कडकडाटासह पावसाची रिपरिप सुरू झाली. अर्धा ते  एक तास गारा कोसळल्या. अवकाळी पावसाने मेघगर्जनेसह बरसल्याने यंदाच्या रब्बी हंगामातील उरली सुरली पिके पूर्णत: नष्ट होऊन बळीराजा पुरता गार झाला आहे. शेतीपिकांसह घरावरील पत्रे  उडाली व किरणापूर येथे ३०पेक्षा अधिक इलेक्‍ट्रिक खांब तुटले. त्यामुळे गावातील वीजपुरवठा खंडित झाला आहे. गहू, हरभरा, मिरची पीक, भाजीपाला पिकांबरोबर घरावरील पत्रे, गारपिटीने कौले फुटून जोरदार वाऱ्याने विजेचे खांब रस्त्यावर कोसळल्याने अतोनात नुकसान झाले. खरीप हंगामात धान उत्पादक पाण्याअभावी धानपिकांचे नुकसान झाले होते. अशातच अवकाळी पाऊस, गार व वादळवाऱ्यासह हातातोंडाशी आलेल्या रब्बी पिकांचे प्रचंड नुकसान झाले.

प्रशासनाने सर्वेक्षण करून नुकसानभरपाई देण्याची मागणी नागरिकांनी केली आहे. यावेळी रवींद्र बडवाईक, दिनेश बडवाईक, रवी तांबूलकर, महादेव पाटील, राजन श्रावणकर, राजेश वैद्य, योगेश थोटे आदी शेतकरी उपस्थित होते.

ज्या शेतकऱ्याचे नुकसान झाले असेल त्यांच्या शेतातील पिकांचे सर्वेक्षण करून योग्य तो न्याय मिळेल.
- एच. डी. पटले, तालुका कृषी मंडळ अधिकारी, रामटेक