गडचांदूर (जि. चंद्रपूर) : लॉकडाउन असल्याने कोरपना तालुक्‍याला जोडणाऱ्या तेलंगणा व यवतमाळ जिल्ह्यालगतच्या सर्व सीमा बंद असल्याने वाहने व नागरिक विनापरवानगी प्रवेश करू शकत नाही. शासनाने नुकतेच दारूदुकाने उघडी करताच जिल्ह्यातील दारूतस्करांना पुन्हा सुगीचे दिवस आले आहेत.

गडचांदूर पोलिस उपविभागात रात्रीही काय, आता तर दिवसाही बेधडक दारूतस्करी सुरू असल्याने परिसरात लॉकडाउनमध्येही दारूचा महापूर आहे. पोलिस प्रशासनाचा वचक नाही. सूचनापत्रावर तत्काळ जामीन मिळतो. यात अर्थपूर्ण संबंध असतो. यामुळे गडचांदूर पोलिस उपविभागात अवैध दारूविक्री जोरात आहे. अल्पावधीत पैसे कमविण्याच्या नादात परिसरातील तरुण वर्ग अवैध धंद्यात मोठ्या प्रमाणात गुंतला आहे. यात काही अल्पवयीन मुलेही असल्याने 'फुटली नाही मिशी न विकतोय दारूची शिशी' असे दारूबंदीचे विदारक वास्तव्य जिल्हाभर आहे.

हेही वाचा : वरुडच्या दोन युवकांचा शेकदरी धरणात बुडून मृत्यू 

सध्या जिल्ह्यातील दारूबंदी हटणार, अशी चर्चा असल्याने अवैध दारूतस्करीचा धंदा बंद होण्याच्या भीतीने कमाई करून घेण्याची लगबग आहे. परिसरात मोठ्या प्रमाणात दारू कोण पुरवितो, याचा ठावठिकाणा असूनही कारवाई मात्र हस्तकांवरच केली जाते. मागील पाच वर्षांत अनेक दारूतस्करांवर गुन्हे नोंदविले गेले. दारूसाठा जप्त करूनही कायद्याच्या किचकट डावपेचांमुळे गुन्हेगार दोषमुक्त होतो. शिक्षाच होणारच नाही, याची कल्पना असल्याने पाच वर्षे होऊनही दारूबंदी झाली नाही. शेवटी जिल्ह्यातील दारूबंदी उठणार असल्याचे भाकीत मद्यप्रेमींना असून, बेरोजगार झालेले परवानाधारकही मोठ्या आतुरतेने सरकार दारूबंदी कधी उठविणार, याकडे लक्ष देऊन आहे.