भंडारा-गोंदिया : प्राथमिक आरोग्य केंद्रासह आरोग्य सेवेत कार्यरत असलेल्या कंत्राटी रुग्णवाहिकाचालकांनी आरोग्य विभागात कायम नियुक्ती मिळावी, या मागणीसाठी आंदोलन सुरू आहे. आंदोलनात भंडारा येथे एका चालकाने विष घेण्याचा, तर गोंदिया येथे चालकांनी आत्मदहनाचा प्रयत्न केल्याने एकच खळबळ उडाली.

रुग्णवाहिका चालकांचे कंत्राट भोपाळ येथील कंपनीकडे होते. ३० जुलैला कंपनीचे कंत्राट संपल्यामुळे त्याच्यासोबत अनेक चालक रस्त्यावर आले आहेत. शिवाय, कंत्राटदार कंपनीकडून मिळणारे अपुरे मानधन, सुट्या, विमा व इतर सुविधा मिळत नसल्याने हे चालक एनआरएचएमअंतर्गत नियुक्ती करण्याची मागणी करत होते. मागणीसाठी सोमवारी (ता. २) जिल्हा परिषदेच्या मुख्य कार्यकारी अधिकारी यांच्या कक्षात चर्चा होती.

अशाच एका रुग्णवाहिकेवर १६ वर्षांपासून कंत्राटी चालक म्हणून कार्यरत असलेला जितेंद्र डोंगरे हा चर्चेत उपस्थित होता. बैठकीत कोणताही तोडगा निघण्याची शक्यता दिसत नसल्याने जितेंद्रने खिशातून उंदीर मारण्याचे विष काढून खाण्याचा प्रयत्न केला. परंतु, उपस्थित पोलिसांनी हस्तक्षेप करून विषाची पुडी हिसकावली. त्यानंतर त्याची समजूत काढून वरिष्ठ अधिकाऱ्यांसोबत चर्चा घडवून आणली. यावेळी मुख्य कार्यकारी अधिकाऱ्यांनी १५ दिवसांत याबाबत निर्णय घेण्याचे आश्‍वासन दिले. चालकाने कार्यकारी अधिकाऱ्यांच्या कक्षात विष घेतल्याने कार्यालयात काही काळ गोंधळाची स्थिती निर्माण झाली होती.

आत्मदहनाचा प्रयत्न

याच मागण्यांसाठी गोंदिया जिल्हा परिषदेसमोरही रुग्णवाहिका चालकांचे आंदोलन सुरू आहे. सोमवारी दुपारच्या सुमारास आंदोलकांनी आंदोलनस्थळी अंगावर पेट्रोल टाकून आत्मदहनाचा प्रयत्न केला. पोलिसांनी आंदोलक रुग्णवाहिकाचालकांना अटक करून नंतर सुटका केली. त्याचप्रमाणे आंदोलकांनी जि. प. समोरील बायपास मार्गावरील वाहतूक रोखून धरली. त्यामुळे पोलिसांनी आंदोलकांना ताब्यात घेतले.