परतवाडा : अचलपूर तालुक्यातील परसापुर येथील एकलव्य रेसिडेन्शियल शाळेतील ३४ विद्यार्थ्यांची प्रकृती आज नाश्ता केल्यावर अचानक बिघडल्याने त्यांना तातडीने अचलपूरच्या उपजिल्हा रुग्णालयात दाखल करण्यात आले असून या घटनेने चांगलीच खळबळ उडाली आहे.

एकलव्य रेसिडेन्शियल शाळा चिखलदरा येथून स्थलांतरित झाली असून ही शाळा सध्या अचलपूर तालुक्यातील परसापूर येथे सुरू आहे. या ठिकाणी सुमारे ३३४ विद्यार्थी राहतात. या विद्यार्थ्यांना राहण्यासह आदी आवश्यक सुविधांचा अभाव असून त्यामुळे विद्यार्थ्यांना गैरसोयीचा सामना करावा लागत असल्याची ओरड सातत्याने होत होती. आज गुरुवारी (ता. २७) सकाळी या शाळेतील विद्यार्थ्यांना नाश्त्यात पोहे देण्यात आले. नाश्ता झाल्यानंतर अनेक विद्यार्थ्यांना उलटी व मळमळ सारखी लक्षणे दिसून आली.

शाळेच्या व्यवस्थापकाने या विद्यार्थ्यांना अचलपूर येथील उपजिल्हा रुग्णालयात उपचारासाठी दाखल करण्यात आले. डोके दुखणे, श्वास घ्यायला त्रास होणे आणि पोट दुखणे असा त्रास विद्यार्थ्यांना होत असल्याने त्यांना उपजिल्हा रुग्णालयात उपचारासाठी दाखल करण्यात आले. सध्या सर्वांची प्रकृती स्थिर आहे. असे शाळा प्रशासन व आरोग्य विभागाकडून सांगण्यात आले.

आदिवासी विकास विभागाअंतर्गत ही शाळा चालविला जाते. या विद्यार्थ्यांच्या शिक्षणावर व जेवणावर लाखो रुपयांचा निधी खर्च केला जातो. मात्र तरीही या विद्यार्थ्यांना दर्जेदार जेवण दिल्या जात नसल्याचा आरोप होत असून याची सखोल चौकशी करून दोषींवर कारवाई करण्यात यावी, अशी मागणी होत आहे.

मी दोन दिवसांआधी एकलव्य शाळेवर भेट दिली होती. त्यावेळी प्रकल्प अधिकाऱ्यांना सूचना दिल्या होत्या. या ठिकाणी मुलांना गैरसोय होत आहे, जेवण बरोबर देण्यात येत नाही, अभ्यासाची सोय नाही. मुलांची गैरसोय होत आहे, असे दिसून आले. आज २५ मुले उपजिल्हा रुग्णालयात भरती आहेत. या प्रकरणी दोषींवर विधानसभेत कारवाई करण्याची मागणी मी करणार आहे.

- राजकुमार पटेल, आमदार, मेळघाट.

उपजिल्हा रुग्णालयात विद्यार्थी उपचारासाठी दाखल झाले असून याची संपूर्ण चौकशी करून वरिष्ठांकडे सविस्तर अहवाल सादर करणार.

- आर. आर. साखरकर, शिक्षण विस्तार अधिकारी, प्रकल्प कार्यालय, धारणी.