अमरावती : स्वच्छ महाराष्ट्र अभियान योजनेतील बडनेरा झोनमध्ये वैयक्तिक शौचालयाच्या बांधकामाचे देयक बनावट स्वाक्षरी करून देण्यात आले होते. या प्रकरणात अखेर महापालिका आयुक्त प्रशांत रोडे यांनी फौजदारी गुन्हे दाखल करण्याचे आदेश दिले आहेत. शुक्रवारी, ता. 26 जून रोजी सकाळी पोलिसात यासंदर्भात कार्यालय अधीक्षक तक्रार दाखल करणार आहेत. 

बडनेरा झोनमध्ये वर्ष 2018 मध्ये 452 वैयक्तिक शौचालयांचे बांधकाम करण्यात आले होते. या बांधकामाचे 77 लाख रुपयांचे देयक गेल्या बुधवारी (ता.17) अंतिम मंजुरीसाठी महापालिका आयुक्त प्रशांत रोडे यांच्याकडे पाठविण्यात आले होते. आयुक्त रोडे यांना संशय आल्याने त्यांनी चौकशी केली व हा बनावटपणा उघडकीस आला. या प्रकरणी त्यांनी उपायुक्त खोराटे यांची एक सदस्य समिती नियुक्त केली. या समितीने बुधवारी (ता. 24) रात्री चौकशी अहवाल सादर केला. या अहवालाचे वाचन केल्यानंतर आयुक्त प्रशांत रोडे यांनी गुरुवारी (ता.25) रात्री उशिरा पोलिसात तक्रार दाखल करण्याचे आदेश दिले आहेत. 

अवश्य वाचा-  पब्जीत आकंठ बुडाला, सोळा सोळा तास चालायचा गेम, अखेर निर्णायक क्षण आला आणि... 

कार्यालय अधीक्षक शुक्रवारी (ता. 26) पोलिसात रितसर तक्रार दाखल करणार असल्याचे आयुक्त रोडे यांनी सांगितले. ही माहिती देताना त्यांनी संशयितांविरुद्ध तक्रार करणार आहे, असे सांगितले असले तरी पोलिसात ती दाखल होईस्तोवर या प्रकरणात सहभागी इतरांची नावे सांगण्यास मात्र नकार दिला. कुणालाही पूर्वसंधी द्यायची नाही, हे त्यांचे म्हणणे या प्रकरणाची व्याप्ती मोठी असल्याचे दर्शविणारी आहे.