अमरावती : दारू पिण्यासाठी पैशाची मागणी पूर्ण करण्यास नकार दिल्याने चिडलेल्या तिघांनी मिळून एकाचा खून केला. मंगळवारी (ता. १) रात्री साडेआठच्या सुमारास ही घटना घडली. सुधाकर भीमराव भुरमुंदे (वय ४३, रा. शिरसगावकसबा) असे मृत व्यक्तीचे नाव आहे.

पोलिसांनी दिलेल्या माहितीनुसार, रात्रीच्या सुमारास सुधाकर भुरमुंदे हे भाजीपाला आणण्यासाठी जात होते. गावातील जयस्वाल यांच्या देशी दारूच्या दुकानाजवळ तिघांनी सुधाकर भुरमुंदे यांना दारू पिण्यासाठी पैसे मागितले. मात्र, त्यांनी पैसे देण्यास नकार दिला. त्यामुळे तिघांनी त्यांच्यासोबत वाद घालत शिवीगाळ केली.

यानंतर सदानंद ज्ञानेश्वर धाकडे, विजय हकीम मंडलिया यांनी भुरमुंदे यांना पकडून ठेवले. तर आकाश प्रकाश धाकडे याने चाकूने सपासप वार केले, असा आरोप आहे. हल्ल्यात गंभीर जखमी सुधाकर भुरमुंदे यांना उपचारासाठी अचलपूर उपजिल्हा रुग्णालयात दाखल करण्यात आले. मात्र, उपचारादरम्यान त्यांचा मृत्यू झाला.

अधिक वाचा - विवाहिता प्रसूतीसाठी माहेरी आली अन् दीड महिन्याच्या चिमुकल्याला गमावून बसली; भर दुपारी अपहरण

श्रीकृष्ण भुरमुंदे यांच्या तक्रारीवरून आकाश, विजय व सदानंद या तिघांविरुद्ध खुनाचा गुन्हा दाखल होऊन तिघांनाही चोवीस तासात अटक करण्यात आल्याचे पोलिस उपनिरीक्षक मनोज सुरवाडे यांनी सांगितले. तिघांनाही गुरुवारी (ता. तीन) डिसेंबरला न्यायालयासमोर उपस्थित केले जाईल. उपविभागीय पोलिस अधिकारी, पोलिस निरीक्षकांनी घटनास्थळी भेट दिली.

संपादन - नीलेश डाखोरे