अमरावती - अमरावतीत छत्रपती शिवाजी महाराजांच्या पुतळ्याचा वाद पुन्हा चिघळण्याची शक्यता आहे. पुतळ्याच्या प्रकरणावरून अमरावती महानगर पालिका आयुक्तांच्या अंगावर शाई फेकण्याचा प्रकार घडला आहे. राजापेठ उड्डाणपुलावर बसवण्यात आलेल्या छत्रपती शिवाजी महाराजांच्या पुतळ्याला प्रशासनाने हटवल्यानं शिवप्रेमी नाराज झाले होते.

याबाबत मिळालेली माहिती अशी की, अमरावती महानगरपालिका आयुक्त प्रवीण आष्टीकर यांच्या अंगावर शाई फेकण्यात आली आहे. राजापेठ उड्डाणपुलावर ही घटना घडली. शिवाजी महाराजांच्या पुतळ्यावरून आक्रमक झालेल्या शिवप्रेमींनी शाई फेकली आहे. याप्रकरणी काही शिवप्रेमी महिलांना ताब्यात घेण्यात आलं आहे.

अमरावतीमधील राजापेठ उड्डाणपुलावर छत्रपती शिवाजी महाराजांचा पुतळा बसवण्यात आला होता. हा पुतळा महानगरपालिकेने काही काळाने हटवला. त्यानंतर परिसरात प्रचंड बंदोबस्त तैनात केला होता. हा पुतळा हटवू नये अशी मागणी काही संघटनांनी केली होती.