चांदूर बाजार (जि. अमरावती)  : तालुक्‍यातील शिरसगाव अर्डक व राजुरा परिसरात वाघाचे दर्शन झाल्याने परिसरात व तालुक्‍यात दहशतीचे वातावरण निर्माण झाले आहे. 

रस्त्यावर दिसला वाघ

गुरुवारी (ता.9) रात्री 9.30 वाजताच्या सुमारास शिरजगाव अर्डक गावाजवळ गजानन वानखडे गावामध्ये जात असताना रस्त्यावर त्यांना वाघ दिसला. याची सूचना त्यांनी गावकऱ्यांना दिली. त्यानंतर याची माहिती वनविभागाला देण्यात आली. माहिती मिळतात वनविभागाची चमू गावामध्ये दाखल झाली. त्यानंतर त्यांनी त्या भागात वाघाची शोधमोहीम सुरू केली. मात्र, रात्र झाल्याने पुन्हा सकाळी घटनास्थळी जाऊन परिसराची पाहणी करताना वाघाचे पगमार्क आढळून आले. हे पगमार्क सोळा बाय सोळाचे असल्याचे अधिकाऱ्यांनी सांगितले. हाच वाघ वनरक्षक पी. के. वाटाणे यांना शुक्रवारी सकाळी राजुरा शिवारात दिसून आला. त्याचेही पगमार्क घेतले असता सोळा बाय सोळाचे असल्यामुळे हाच तो वाघ असावा, असा अंदाज वनविभागाने व्यक्त केला आहे. 

अवश्‍य वाचा- जंगलातून कमी होणार 86 हजार हेक्‍टर "झुडपी' क्षेत्र 

परिसरात भीतीचे वातावरण

तो वाघ मोर्शी वनपरिक्षेत्रात दाबेरी जंगलात गेला असल्याचा अंदाज व्यक्त होत आहे. वाघाचे दर्शन झाल्यामुळे शिरजगाव अर्डक, जवळा, तळवेल, खरवाडी, बेलोरा, राजुरा या परिसरात भीतीचे वातावरण निर्माण झाले आहे. गावकऱ्यांनी सतर्क राहण्याकरिता काही ग्रामपंचायतींनी गावात दवंडी सुद्धा दिली आहे. 

नागरिकांनो सावध रहा! 

परिसरातील नागरिकांनी दोन-तीन दिवस सावधगिरी म्हणून रात्रीला शेतात जाण्याचे टाळावे. शेतातून लवकर घरी या. आपल्या पाळीव जनावरांना सुरक्षित ठिकाणी ठेवा, असे आवाहन वन विभागातर्फे करण्यात आले आहे. 

मिळालेल्या माहितीनुसार आम्ही घटनास्थळी जाऊन तपासणी केली असता ते पगमार्क वाघाचे असल्याचे आढळून आले. 
- पी.एस. भड, वनपरिक्षेत्र अधिकारी, परतवाडा.