अमरावती : नांदगावपेठ परिसरात एकमेकांच्या शेजारी जनावरांचे गोठे असताना, कचरा फेकण्याच्या कारणावरून वाद झाला. हा वाद चपराशीपुऱ्यापर्यंत पोहोचून, रात्री प्राणघातक हल्ला करून खून करण्याचा प्रयत्न झाला. 

जुनेद अहमद कुरेशी (वय 27, रा. चपराशीपुरा) असे हल्ल्यातील गंभीर जखमीचे नाव असून, त्याच्यावर खासगी रुग्णालयात उपचार सुरू आहे. फ्रेजरपुरा पोलिसांनी अनिस खॉ मनसब खॉ कुरेशी (वय 61), सोहेल खॉं अनिस खॉं कुरेशी (वय 21) व शोएब खॉ अनिस खॉ कुरेशी (19, सर्व. रा. चपराशीपुरा) तिघांविरुद्ध गुन्हा दाखल करून त्यांना रात्रीच अटक केली. जुनेद कुरेशी व अनिस कुरेशी या दोघांचे जनावरांचे गोठे हे नांदगावपेठ परिसरात आहेत. 

शुक्रवारी (ता. 15) सायंकाळी पाचच्या सुमारास त्या दोघांमध्ये कचरा टाकण्याच्या कारणावरून आधी शाब्दिक वादातून भांडण झाले होते. हा वाद मिटल्यानंतर ते दोघेही चपराशीपुरा परिसरात घरी परतले. सायंकाळचा वाद पुन्हा रात्रीच्या सुमारास उफाळून आला. वडील बोलावित असल्याचा निरोप देऊन जुनेद अहमदला बाहेर बोलविले. बाहेर पडताच, नमूद तिघांनी, तलवारीसह सुऱ्यांनी हल्ला केला.

- पत्नी बनली रणचंडिका; पतीच्या प्रेयसीला धु..धु धुतले... वाचा काय झाले ते

त्यात जुनेद गंभीर जखमी झाला. हल्ल्याच्या ठिकाणी चपराशीपुरा परिसरात पोलिस दल दाखल झाले. चौकशी करून यातील हल्लेखोरांना मध्यरात्रीच्या सुमारास अटक केली. तपास अधिकाऱ्यांनी शनिवारी (ता. 16) तिघांनाही न्यायालयासमोर हजर केले. खुनाचा प्रयत्न केल्याप्रकरणी तिघांविरुद्ध फ्रेजरपुरा ठाण्यात गुन्हा दाखल झाला.