देवळी (जि. वर्धा) : गावाला सोडून देण्याच्या बहाण्याने गावातील दोन युवकांनी एका अल्पवयीन मुलीवर अतिप्रसंग करण्याचा प्रयत्न केला. दोन्ही आरोपींच्या हाताला चावा घेऊन मुलीने पळ काढला. मोबाईलने गावात संपर्क साधत तिने मदत मागितल्याने या युवकांच्या तावडीतून तिची सुटका झाली. ही घटना बुधवारी (ता. 16) घडली.

अंदोरी येथे राहणारी अल्पवयीन मुलगी देवळी येथे शिकत होती. तिच्या आईचा मोबाईल बंद असल्याने त्याच्या दुरुस्तीकरिता ती देवळी येथे आली. मोबाईल दुरुस्तीचे काम झाल्यानंतर गावी परत जाण्याकरिता बसस्थानकावर ती उभी होती. दरम्यान, गावातील सूरज शंकर कोरचे (वय 23) व प्रशांत गजानन भोयर (वय 21) हे दोघे दुचाकीने बसस्थानकावर आले. तिथे आम्ही अंदोरीला चाललो असे म्हणत तिला सोडून देण्याचे म्हटले. दोघेही युवक गावातील असल्याने तिने होकार दिला.

कोरोना ब्रेकिंग : विदर्भात रुग्णांची वाढ थांबता थांबेना, एका दिवशी वाढले इतके रुग्ण

तिघेही गावाकडे निघाले असताना शिंगरवाडी गावालगत पुलाजवळ दुचाकी थांबवून या दोघांनी तिच्यावर बळजबरी करण्याचा प्रयत्न केला. मुलीने आरोपीच्या हाताचा चावा घेत पळ काढला आणि थेट शिंगरवाडी बसस्थानक गाठत गावात संपर्क केला. ही माहिती सरपंच जयकुमार वाकडे यांना मिळताच ते शिंगरवाडीला पोहोचले. येथून या मुलीला घेत त्यांनी पोलिस ठाणे गाठले. येथे या युवकांविरुद्ध तक्रार दाखल केली. दोन्ही युवकांना अटक करण्यात आली आहे. पुढील तपास उपविभागीय पोलिस अधिकारी तृप्ती जाधव यांच्या मार्गदर्शनात सुरू आहे. अल्पवयीन मुली आणि महिलांवरील वाढत्या अत्याचाराच्या प्रकारामुळे नागरिकांमध्ये भीतीचे वातावरण असून, पोलिसांनी गस्त वाढविण्याची मागणी होत आहे.