नागपूर : अनाथ असलेल्या 16 वर्षीय भाचीला झोपेच्या गोळ्या चारून दोन नराधम मामांनी अत्याचाराचा प्रयत्न केला. या प्रकरणी युवतीच्या तक्रारीवरून दोन्ही मामांविरुद्ध पोलिसांनी गुन्हा दाखल केला. ही घटना तहसील पोलिस ठाण्याच्या हद्दीत घडली.
पोलिसांनी दिलेल्या माहितीनुसार, पीडित अल्पवयीन मुलीचे मामा नागपुरातील तहसील हद्दीत राहतात. ती 11 वर्षांची असताना वडील अपघातात मरण पावले; तर आई आजारपणामुळे मरण पावली. त्यामुळे ती मोमीनपुऱ्यात मोठ्या मामांकडे राहत होती. नवव्या वर्गापर्यंत तिने शिक्षण घेतले. मामी तिला घरकाम करण्यासाठी त्रास देत होती; तर मामा नेहमी तिच्याशी अश्‍लील चाळे करीत होते. मात्र, अनाथासारखी स्थिती असल्यामुळे ती मामाचा अत्याचार सहन करीत होती. 6 जानेवारी 2015 ला पहिल्यांदा तिला झोपेच्या गोळ्या खाऊ घालून तिच्याशी मामाने अश्‍लील चाळे केले. तेव्हापासून मामाचा शारीरिक त्रास नेहमीचाच सुरू झाला. त्यामुळे तिने कंटाळून दुसऱ्या मामाकडे जाण्याचा निर्णय घेतला. दुसऱ्या मामाने तिला काही दिवस घरी ठेवले. त्यानंतर तिच्याशी अश्‍लील चाळे करायला लागला. दोन्ही घरी सारखाच त्रास होत असल्यामुळे ती मनाने खचून गेली होती. त्यामुळे तिने एका नगरसेविकेला आपबिती सांगून मदत मागितली. नगरसेविकेने तिला तहसीलचे ठाणेदार अजयकुमार मालवीय यांच्याकडे नेले. त्यांनी मुलीची चौकशी केली. मामांनी अत्याचार केल्याचे लक्षात आले. त्यामुळे दोघांवरही गुन्हे दाखल करण्यात आले.