चांदूररेल्वे (जि. अमरावती) : जगात विविध छंद जोपासणारे अनेक जण पाहिले आहेत. त्यातीलच आपल्या गुरूंनी दिलेला आयुर्वेदाचा वारसा जपणारे एक अफलातून व्यक्तिमत्त्व तालुक्यातील नया सावंगा येथे पाहावयास मिळते. त्यांच्या घराला आयुर्वेदिक व गुणकारी वेलींनी वेढले आहे. आयुर्वेदिक वनस्पतींची ते आपल्या प्राणासारखे संवर्धन करतात. श्रीकृष्ण नारायण भलावी, असे या व्यक्तिमत्त्वाचे नाव.

गुळवेल, धोत्रा, तुळस, सब्जा, सतावरी, वासनवेल, लाजवंती, पांढरेगुंज, समुद्रशेष, जठाशंकर, हाडजोड, श्वेत अपराजिता, पर्णकुटी यासारख्या असंख्य आयुर्वेद वनस्पती भलावी यांनी आपल्या अंगणात लावल्या व त्यांचे जतन केले. त्यांच्या घरात लागलेल्या समुद्रशेष या वेलाने तर घराला आच्छादन केले आहे.

या छंदाविषयी त्यांनी सांगितले, त्यांचे गुरू पागलदास बाबा यांचा वारसा ते सांभाळत आहेत. अमरावती मार्गावर पोहरा ते चिरोडीच्या मधात पागलदास महाराज यांचा आश्रम आहे. महाराजांना आयुर्वेदाचे ज्ञान होते. ते अनेक आजारांवर गुणकारी औषधे देत. त्यांच्यानंतर सेवाभावाने श्रीकृष्ण भलावी यांनी त्यांचा वारसा जपण्यासाठी आयुर्वेदिक वनस्पतींमध्ये स्वतःचे जीवन वाहिल्याचे त्यांनी सांगितले.

कुटुंब करते वनस्पतींचे संवर्धन

उदरनिर्वाह म्हणून शेती आणि दर शनिवारी, मंगळवारी ते मंदिरात येणाऱ्या रुग्णांना आयुर्वेदिक औषधे देतात. त्यांनी त्यांच्या घराच्या आवारात अशा गुणकारी वनस्पतींचे छोटे जंगलच उभे केले. त्यांचे कुटुंब या वनस्पतींचे संवर्धन करतात. नुकतेच माजी आमदार वीरेंद्र जगताप यांनी त्यांच्या घरी भेट देऊन वृक्षप्रेमाची प्रशंसा केली.