गडचांदूर (जि. चंद्रपूर) : कॉंग्रेसचे राष्ट्रीय नेते, खासदार राहुल गांधी यांच्या वाढदिवसानिमित्त कॉंग्रेस पक्षाकडून विविध उपक्रम राबविण्यात आले. यातच गडचांदूरमध्ये कॉंग्रेस पक्षाने राबवलेला उपक्रम सध्या सोशल मीडियावर चांगलाच व्हायरल होत असल्याने जोरदार चर्चा होत आहे. या चर्चेमागील कारण अजबच आहे.

गडचांदूर ग्रामीण रुग्णालयात कोरपना तालुका कॉंग्रेस पदाधिकाऱ्यांनी खासदार राहुल गांधी यांच्या वाढदिवसानिमित्त रुग्णांना फळवाटप केले. बेडवर ज्या रुग्णाला फळवाटप केले तोच रुग्ण ठणठणीत असल्यासारखा रुग्णालयाबाहेर कॉंग्रेस पदाधिकाऱ्यांसोबत बॅनर पकडून उभा दिसत आहे. विशेष म्हणजे कॉंग्रेसच्या नेत्यांसोबत सदर रुग्णाने बॅनर पकडून आपले फोटोही काढून घेतले. तेच फोटो कॉंग्रेस पदाधिकाऱ्यांनी सोशल मीडियावर व्हायरल केल्याने परिसरात खमंग चर्चा होत आहे. काही नागरिकांना फळवाटप कार्यक्रमातील हा प्रकार समजल्याने या उपक्रमाचे फोटो सोशल मीडियावर नागरिकांसाठी विनोदाचा भाग बनला आहे.

अवश्य वाचा- स्कूलव्हॅनचालक आर्थिक संकटात! व्हॅनमधील कोरोना प्रादुर्भावाचे काय?

सोशल मीडीयावर व्हायरल झालेल्या फोटोत ज्या रुग्णाला फळवाटप केले, तोच रुग्ण कॉंग्रेस नेत्यांसोबत हातात बॅनर पकडून फोटोत दिसत आहे. फळवाटप केलेला व बॅनर पकडणारा एकच व्यक्ती असून, कॉंग्रेस नेत्यांच्या ही बाब लक्षात कशी आली नाही? याचे आश्‍चर्य व्यक्त केले जात आहे. गडचांदूर रुग्णालयातील कॉंग्रेसच्या या अजब फळवाटपाची सोशल मीडियावर चर्चा आहे.