अकोला : धान्याची उचल न करता लाभार्थ्यांना धान्यापासून वंचित ठेवणाऱ्या अकोट तालुक्यातील मौजे पारडा व देवर्डा येथील रास्त भाव दुकानदार व्ही.आर. खोटरे यांचे प्राधिकारपत्र (परवाना) निलंबित करण्यात आले आहे. सदर कारवाई जिल्हा पुरवठा अधिकारी बी.यू. काळे यांनी रास्त भाव दुकानात जावून केल्यामुळे इतर रास्त भाव दुकानदरांचे धाबे दणाणले आहेत.

अन्न नागरी पुरवठा व ग्राहक संरक्षण विभागाने प्रत्येक महिन्याच्या 7 तारखेला अन्न दिवस व 14 तारखेपर्यंत अन्न सप्ताह साजरा करण्याचे निर्देश सर्व जिल्ह्यातील पुरवठा अधिकारी व रास्तभाव दुकानदारांना दिले आहेत. त्यामुळे प्रत्येक महिन्याच्या 14 तारखेपर्यंत रास्तभाव दुकानातून धान्याचे 100 टक्के वाटप करणे रास्तभाव दुकानदारांना बंधनकारक आहे.

अकोट तालुक्यातील मौजे पारडा व देवार्डा येथील रास्तभाव दुकानदार व्ही.आर. खोटरे यांनी डिसेंबर 2019चे मागणीपत्रक 29 नोव्हेंबर रोजी मंजूर केल्यानंतर सुद्धा निश्‍चित मुदतीत धान्याची रक्कम शासन जमा केली नाही तसेच धान्याची उचल सुद्धा केली नाही. त्यामुळे त्यांच्या दुकानाशी संलग्न असलेले लाभार्थी धान्यापासून वंचित राहिले.

अशा प्रकारचा अहवाल अकोटचे तहसीलदार व पुरवठा निरीक्षक यांनी जिल्हा पुरवठा अधिकारी बी.यू. काळे यांच्याकडे पाठवला. सदर अहवालाची पडताळणी करून योग्य कार्यवाही करण्यासाठी पुरवठा अधिकाऱ्यांनी सदर रास्तभाव दुकानाची पारडा व देवार्डा येथे जावून तपासणी केली. त्यामध्ये पुरवठा अधिकारी काळे यांना दुकानदार खोटरे लाभार्थ्यांना वेळेवर धान्याचा पुरवठा करण्यास सक्षम नसल्याचे आठळल्यामुळे त्यांच्या दुकानाचे गुरुवारी (ता. 12) प्राधिकारपत्र निलंबत करण्यात आले आहे.

या प्रकरणाची तहसीलदार अकोट यांनी एक महिन्याच्या आत सखोल चौकशी करून अहवाल सादर करण्याचे आदेश सुद्धा पुरवठा अधिकाऱ्यांनी दिले आहेत.