मेडशी : आठवडी बाजाराच्या गर्दीचा फायदा घेत, तिघांनी 50 रुपयांच्या बनावट नोटा चलनात आणण्याचा प्रयत्न केला. मात्र, दुकानदारांना संशय आल्याने दोघांना पकडून स्थानिक पोलिस चौकीत नेण्यात आले. हा प्रकार गुरुवारी (ता.17) दुपारी येथील आठवडी बाजारात घडला. त्यातील दोघे जण पळूण जाण्यात यशस्वी झाले.

हे वाचा - जिल्हा परिषदवर पुन्हा भारिपची सत्ता
दोघे पळूण जाण्यात झाले यशस्वी
येथील आठवडी बाजारामध्ये गुरुवारी (ता.17) दुपारी एक वाजता एका चारचाकी वाहनातून चार व्यक्ती आले. त्यापैकी तिघांनी आठवडी बाजारात 50 रुपयांच्या नोटा देऊन काही साहित्य खरेदी केले. मात्र, काही दुकानदारांना या नोटा बनावट असल्याची शंका आली. त्यामुळे व्यापाऱ्यांनी त्यापैकी दोघांना पकडून स्थानिक पोलिस चौकीमध्ये घेऊन गेले. यावेळी जमादार सुरेंद्र तिखिले यांनी त्यांची चौकशी केली असता, दोघांजवळ व बाजारातून दुकानदारांनी आणून दिलेल्या नोटा असे एकूण एक हजार 450 रुपये आढळून आले. पोलिसांनी प्रतीक बाबाराव कांबळे (वय 25) व दिनेश राजेश देशमुख (वय 24) दोघेही रा. पूलगाव जि. वर्धा यांना ताब्यात घेतले. तसेच पुढील चौकशीकरिता मालेगाव पोलिस ठाण्यात नेण्यात आले. चारपैकी दोघे जण पळूण गेले आहेत. पुढील तपास पोलिस करीत आहेत.