बुलडाणा : विनापरवाना दारू विक्री करणार्‍या ढाबा मालक आणि याठिकाणी दारू पिणार्‍यांना न्यायालयाने दंड ठोठावला. राज्य उत्पादन शुल्क विभागाने चिखली आणि मेहकर परिसरात या कारवाई केल्या आहेत. यात दोन हॉटेलचालक आणि पाच व्यक्तींविरूद्ध कारवाई करण्यात आली.

राज्य उत्पादन शुल्क विभागाने जिल्ह्यातील हॉटेल काकाजी ढाबा, पेठ, ता. चिखली, हॉटेल श्रीयोग, मेहकर फाटा, भालगांव शिवार, ता. चिखली, हॉटेल विघ्नहर्ता, मेहकर फाटा, भानखेड शिवार, ता. चिखली, हॉटेल अन्नदाता, चिखली लोणार रोड, मेहकर, ता. मेहकर या हॉटेलमध्ये अवैधरित्या दारु पिण्याकरिता बसलेल्या व्यक्तींवर कारवाई करण्यात आली. या कार्यवाहीत एकुण १४ हजार ५९७ रुपयांचा मुद्देमाल जप्त करण्यात आला.

यातील सर्वांवर महाराष्ट्र दारुबंदी अधिनियम १९४९ नुसार गुन्हा करण्यात आला. या गुन्ह्यातील व्यक्तींना न्यायदंडाधिकारी एच. डी. देशिंगे यांनी दोन हॉटेल चालकांना प्रत्येकी ४० हजार रूपये, तसेच विना परवाना असलेल्या हॉटेल, ढाब्यावर मद्यसेवन करणार्‍या ५ व्यक्तींना प्रत्येकी ५ हजार रुपये याप्रमाणे एकुण १ लाख ५ हजार रूपयांचा दंड आकारला.

सरकारी वकील व्ही. एम. परदेसी यांनी कामकाज पाहिले. सदर कार्यवाही चिखलीचे निरीक्षक जी. आर. गावंडे, निरीक्षक किशोर पाटील, आर. आर. उरकुडे, दुय्यम निरीक्षक एस. डी. चव्हाण यांनी केली. गुन्ह्याच्या तपासात दुय्यम निरीक्षक ए. आर. आडळकर, आर. ई. सोनुने, जी. व्ही. पहाडे, एन. ए. देशमुख, एस. डी. जाधव, एस. अवचार, एस. बी निकाळजे, ए. एम. सोळंकी, ए. पी. तिवाने, पी. ई चव्हाण वाहनचालक आर. ए. कुसळकर, एम. एस. जाधव आणि व्ही. पी. पाटील यांनी सहाकार्य केले.

राज्य उत्पादन शुल्क विभागातर्फे अवैरित्या हॉटेल, ढाब्यामध्ये दारु विक्री करणार्‍या तसेच मद्यसेवन करणार्‍यांविरोधात कारवाई करण्यात येत आहे.

अवैध पद्धतीने दारु बनविणे, दारुचे वाहतूक करणे असे प्रकार घडत असल्यास राज्य उत्पादन शुल्क विभागास सुचना देण्यात यावी, असे आवाहन करण्यात आले आहे.