वर्धा : बुलढाण्यात (Buldhana) काल एका प्रवासी बसचा भीषण अपघात (Accident) झाल्याची घटना घडली. यामध्ये 25 प्रवाशांचा जागीच मृत्यू झाला आहे. बसमध्ये एकूण 33 प्रवासी होते.

यातील आठ प्रवासी सुखरुप बाहेर पडले आहेत. बुलढाणा जिल्ह्यातील सिंदखेडराजाजवळ पिंपळखुटा गावालगत समृध्दी महामार्गावर (Samruddhi Highway) हा अपघात झाला. ही प्रवासी बस नागपूरहून पुण्याला निघाली होती. त्यावेळी रात्री दीड वाजण्याच्या सुमारास ही भीषण घटना घडली.

अपघातग्रस्त बस ही नागपूरहून पुण्याकडं जात होती. त्यावेळी हा अपघात घडला. या बसमध्ये नागपूर, वर्धा आणि यवतमाळचे प्रवासी होते. ही बस विदर्भ ट्रॅव्हल्सची होती. दरम्यान, लग्नानंतर आखाडीसाठी बहिणीला आणण्याकरिता गेलेला भाऊ या अपघातात बहिणीपर्यंत पोहोचू शकला नाही.

करण पुरुषोत्तम बुधबावरे (वय २६) असे या भावाचं नाव आहे. तो झडशी (ता. सेलू) येथील रहिवासी असून तोच घरचा कर्ता होता. त्यामुळं त्याचं कुटुंब उघड्यावर आलं आहे. करणच्या वडिलांचा चार वर्षांपूर्वी मृत्यू झाला होता. ते डाक विभागात पोस्टमास्तर म्हणून कार्यरत होते. त्यांच्या जागी त्याला नुकतीच नोकरी लागली होती. घरचा कर्ता असल्याने आखाडीनिमित्त तो बहिणीला आणण्याकरिता पुण्याला जाणार होता. मात्र, दुर्दैवी घटना घडली.