वाडी (जि. नागपूर) : अमरावती महामार्गालगत वाडी नाक्‍याजवळील हजरत सय्यद बाबा मस्तान शाह दर्गा आज मंगळवारी पोलिस बंदोबस्तात मनपाने हटविला.
पंजाबराव देशमुख कृषी विद्यापीठाच्या मालकीच्या जागेवर हा दर्गा आहे. या दर्ग्याची देखरेख करणारे खादिम सलीम, कलाम बेग, खादिम गोलू बाबा असून त्यांनी हा दर्गा 300 वर्षे जुना असल्याचा दावा केला आहे. त्यांनी दिलेल्या माहितीनुसार, या जागेबाबत न्यायालयात प्रकरण प्रलंबित असताना व ट्रस्टला कोणतीही सूचना न देताच पंजाबराव कृषी विद्यापीठ प्रशासनाने नागपूर जिल्हा न्यायालयातून आदेश प्राप्त करून ही कारवाई केल्याचा आरोप केला. दुपारी तीन वाजता वाडी व एमआयडीसी पोलिसांच्या बंदोबस्तात येण्याजाण्याचा मार्ग बंद करून दर्ग्याच्या चारही बाजूने घेराव करून तगड्या बंदोबस्तात मनपाच्या अतिक्रमण हटाव चमूने सायंकाळी 7 वाजेपर्यंत कारवाई करून अतिक्रमण काढले.