अमरावती : एका वेबसाइटच्या माध्यमातून ज्याला जीवनसाथी बनविले तोच धोकेबाज निघाला. त्याने एकाच युवतीसोबत दगाच केला नाही, तर अनेकींच्या जीवनात अंधार पसरविला. एवढ्यावरच तो थांबला नाही, तर मोबाईल विक्रेत्यालाही त्याने फसविल्याची बाब पुढे आली आहे.

पॅराडाइज कॉलनी या सुशिक्षितांच्या भागात ही घटना घडली. वेबसाइटच्या माध्यमातून एका महिलेची शेख सुभान शेख शरीफ ऊर्फ शहनशाह शेख शरीफ (रा. संतोषनगर, हैदराबाद, तेलंगण) याच्याशी ओळख झाली. त्याने या महिलेकडे विवाहाचा प्रस्ताव मांडला. योग्य वराच्या शोधात असलेल्या महिलेने त्याला त्याच्या आईवडिलांसोबत घरी येण्यास व कुटुंबीयांसोबत चर्चा करण्याचा प्रस्ताव दिला. १८ नोव्हेंबर २०१९ ला मात्र तो एकटाच महिलेच्या घरी आला. 

लग्नासंदर्भातील चर्चा झाली. तिने त्याचे आधार कार्ड तपासले. त्यावर शेख सुभान शेख शरीफ असे नाव होते. तो हैदराबाद येथील बंजारा हिल येथे राहत असून, बीटेक झाल्याचे व अमेरिकेत शास्त्रज्ञ म्हणून नोकरी केल्याची पूरक माहिती त्याने दिली. त्याने दिलेली सर्व माहिती तपासल्यानंतर या महिलेने विवाहासाठी होकार दिला. पुढे ७ जून २०२० ला त्यांचा विवाह झाला. दरम्यान, कोरोना संक्रमणाच्या पार्श्र्वभूमीवर लॉकडाउनमुळे त्यांना हैदराबाद येथे जाता आले नाही व त्याने पीडितेच्या घरातच मुक्काम ठोकला.

२३ जूनला शेख सुभानने रुक्मिणीनगर येथील कलंत्री मोबाईल शॉपीमधून ८१ हजार ५०० रुपयांचा अ‍ॅपल कंपनीचा मोबाईल ऑनलाइन खरेदी केला. मात्र, मोबाईल विक्रेत्याच्या खात्यात पैसे जमा झाले नाहीत. त्याने तो मोबाईल लगेच दुसऱ्याला पन्नास हजार रुपयांत विकला. इकडे पैसे मिळाले नाही म्हणून मोबाईल विक्रेता त्याचा शोध घेत असतानाच दुसऱ्या खरेदीदाराने तो सुरू करताच त्याचे लोकेशन विक्रेत्याला मिळाले.

हेही वाचा : आम्ही किती तास करायची प्रतीक्षा?

दुसऱ्या खरेदीदारांकडून शेख सुभानचा शोध कलंत्री मोबाईल शॉपीधारकास मिळाला. त्याने आपली फसवणूक केल्याचे कलंत्री यांना स्पष्ट झाले. शेख सुभानची वर्तणूक संशयास्पद वाटल्याने पीडितेच्या भावाने शेख सुभानबद्दल माहिती जमा करण्यास सुरुवात केली. त्यावेळी शेख सुभानने तलाक झालेल्या अनेक महिलांना अशाच पद्धतीने फसविल्याचे उघडकीस आले. तर पीडितेनेही शेख सुभानचा मोबाईल तपासला असता त्या वेळी तिलाही त्याने बऱ्याच महिलांना फसविल्याचे आढळून आले. 

ही वाचा : लम्पीची बिहार, मराठवड्यातून विदर्भात एंट्री; उद्भवले नवीनच संकट 

त्याचे खरे नाव शेख सुभान नसून शेख शहनशाह शेख शरीफ असल्याचे कळले. त्याने विवाहापूर्वी दिलेली माहिती खोटी असल्याचे दिसून आले. याबाबत विचारणा केली असता त्याने पीडितेला व तिच्या मुलीस जिवे मारण्याची धमकी देणे सुरू केले. अखेर तिने गाडगेनगर पोलिसांना आपबिती सांगून मदत मागितली. गाडगेनगर पोलिसांनी याप्रकरणी शेख सुभान ऊर्फ शेख शहनशाह शेख शरीफविरुद्ध गुन्हे दाखल केले असून त्याचा शोध सुरू केला आहे.
 

संपादन : मेघराज मेश्राम