जेवनाळा (जि. भंडारा) : २५ मे २०२२ रोजी त्याचा वाढदिवस... घरात आनंदाचे वातावरण... कुटुंबीयांनी मुलाचा वाढदिवस करण्याचे ठरवले... मात्र, त्याला कसलीही कल्पना नाही... तयारीही सुरू झाली... मित्र मंडळी व नातेवाइकांना फोनवरून वाढदिवसाची कल्पना देण्यात आली... मात्र, नियतीला काही वेगळेच मान्य होते... वाढदिवशीच मुलाला हिरावून नेले... मन हेलावून टाकणारी ही घटना भंडारा जिल्ह्यातील लाखनी तालुक्यातील जेवनाळा येथे घडली... शुभम धनुजी हेमने (२५) असे मृत तरुणाचे नाव आहे... (Boy death on birthday)

प्राप्त माहितीनुसार, शुभमचा आज वाढदिवस होता. पंधरा दिवसांपूर्वीच मोठ्या भावाचे मोठ्या थाटामाटात लग्न पार पडले होते. यामुळे घरी आनंदाचे वातावरण होते. आनंद द्विगुणित करण्यासाठी कुटुंबीयांनी शुभमचा वाढदिवस साजरा करण्याचा निर्णय घेतला. याची तयारीही सुरू करण्यात आली होती. नातेवाईक व मित्र मंडळींना फोन करण्यात आले.

मात्र, वाढदिवशीच शुभमचा मृत्यू होईल याचा कोणीही विचार केला नव्हता. दुपारी अचानक शुभमला अस्वस्थ वाटू लागले. यामुळे कुटुंबीयांनी त्याला उपचारासाठी रुग्णालयात दाखल करण्याचा निर्णय घेतला. त्याला कुटुंबीय दवाखान्यात दाखल करण्यासाठी घेऊन गेले. मात्र, वाटेतच शुभमचा मृत्यू (death) झाला. वाढदिवशीच तो जग सोडून गेला. यामुळे हेमने कुटुंबावर दुखाचा डोंगर कोसळला.

शुभम हेमने हा कृषी पदवीधारक होता. गावात चांगला मुलगा म्हणून त्याची ओळख होती. शुभमच्या अकाली मृत्यूने गावात शोककळा पसरली आहे. त्याचा मृत्यू पश्चात वडील, आई, दोन भाऊ व बराच मोठा आप्तपरिवार आहे. स्थानिक स्मशानभूमीत शुभमवर अंत्यसंस्कार करण्यात आले.