यवतमाळ : घाटंजी तालुक्‍यातील पांढुर्णा खुर्द येथे सोळा वर्षांच्या व दहावीत शिकत असलेल्या मुलीच्या डोक्‍यावरील वडिलाचे छत्र हरवले. यामुळे तिचे लग्न करून लवकर जबाबदारीमधून मुक्त व्हावे म्हणून बालविवाहाचा घाट घातला होता. मात्र, जबाबदार व्यक्तीने सदर मुलीचे भविष्य अंधारात जाण्यापासून वाचवले. जिल्हा बाल संरक्षण कक्षास माहिती मिळताच त्यांनी गावात धडक देत बालविवाह रोखला.

बालिकेच्या कुटुंबाला बालविवाहाचे दुष्परिणाम समजावून सांगण्यात आले. पालकांना मुलीचे लग्न सज्ञान झाल्यानंतर करण्याबाबत समजावून सांगितले. तसेच बालविवाहाचे शारीरिक, मानसिक दुष्परिणाम समजावून सांगण्यात आले. मुलीचे वय १८ व मुलाचे वय २१ वर्षांपेक्षा कमी असेल तर असा विवाह करणे हा बालविवाह प्रतिबंध अधिनिमय २००६ अन्वये दखलपात्र गुन्हा आहे, याबाबत माहिती देण्यात आली.

अधिक माहितीसाठी - ...तर २६ फेब्रुवारीपासून किमान दहा दिवसांचा लॉकडाऊन

शेवटी मुलीच्या कुटुंबीयांकडून बालविवाह न करण्याबाबत लेखी बंधपत्र उपस्थित पदाधिकारी, अधिकारी व कर्मचारी यांच्या समक्ष लिहून देण्यात आले. यावेळी बालिकेने ‘शिक्षण पूर्ण करू द्या, मला दहावीची परीक्षा द्यायची आहे. पुढे शिक्षण घेऊ द्या’, अशी विनवणी उपस्थितांना केली.

हा बालविवाह रोखण्याची कार्यवाही जिल्हा महिला व बालविकास अधिकारी ज्योती कडू, जिल्हा बाल संरक्षण अधिकारी देवेंद्र राजुरकर यांच्या मार्गदर्शनात बाल संरक्षण कक्षाच्या संरक्षण अधिकारी माधुरी पावडे, आकाश बुर्रेवार, नायब तहसीलदार डी. एम. राठोड, संरक्षण अधिकारी एस. बी. राठोड, ग्रामसेविका मीना मिसाळ, तलाठी एस.पी.राऊत, अंगणवाडीसेविका मिना देठे यांनी पार पाडली.

बालविवाहाबाबत नागरिकांनी दक्ष राहावे
बालविवाहाबाबत नागरिकांनी दक्ष राहावे, तसेच बालविवाहाबाबत माहिती असल्यास आपल्या गावातील ग्रामसेवक, अंगणवाडी सेविका, जिल्हा बालसंरक्षण कक्ष, दगडी इमारत, टांगा चौक, यवतमाळ अथवा चाइल्ड लाइन १०९८ यांना माहिती द्यावी. 
- ज्योती कडू,
जिल्हा बालविकास संरक्षण अधिकारी, यवतमाळ