नागपूर -  मार्च महिन्यात अधिकाऱ्यांमध्ये टार्गेट पूर्ण करण्याची स्पर्धा लागली आहे. अनेक अधिकारी तर मार्च एण्डिंग असल्याने सध्या वेळ नाही. नंतर या असे स्पष्टपणे सांगत असून, शहरातील जनरल पोस्ट ऑफिसमध्ये (जीपीओ) येणाऱ्या नागरिकांना रिकाम्या हातानेच परतावे लागत आहे. त्यामुळे सर्वसामान्य नागरिकांना प्रचंड सहन करावा लागत आहे.

१ एप्रिल ते ३१ मार्च आर्थिक वर्ष असल्याने मार्च महिन्यात अधिकाऱ्यांवर कामाचा अतिरिक्त ताण असतो. परंतु, या कार्यपूर्ततेच्या प्रयत्नात सर्वसामान्य नागरिकही भरडला जात असल्याचे  चित्र आहे. जीपीओ शाखेत आयपीपीबी बॅंकेसाठी खाते उघडायचे असो वा, बचत खात्यांचा हिशेब करायचा किंवा मग पोस्टल विम्याचे काम असो, या सर्वांच्या पूर्ततेसाठी अधिकारी सध्या व्यस्त आहेत. त्यामुळे साधारण कामाकरितादेखील जीपीओत नेहमीपेक्षा अधिक वेळ खर्ची घालावा लागत असल्याचे येथे येणाऱ्या एका व्यक्‍तीने सांगितले.  

जीपीओत व्यक्तिगत कामासाठी आलेल्या एका ज्येष्ठ नागरिकाने सांगितले की, गेल्या दोन दिवसांपासून टपाल विभागाच्या एटीएमशी संबंधित कामाकरिता जीपीओत येरझारा माराव्या लागत आहेत. अधिकारी आपल्याच कामात व्यस्त असल्याने आवश्‍यक माहिती मिळत नाही. त्यामुळे त्रास सहन करावा लागत असल्याचे त्रस्त झालो आहे.  जीपीओतील एका अधिकाऱ्यांनी सांगितले, अधिकाऱ्यांना दिलेले कार्य वेळेच्या आधी पूर्ण करण्यास सांगण्यात आल्याने कामाचा ताण वाढलेला आहे. सुटीच्या दिवशीही अधिकाऱ्यांना ठिकठिकाणी जाऊन शिबिर, कार्यशाळा घ्याव्या लागत आहेत. कार्यपूर्ततेच्या प्रयत्नात अधिकारी इतके मग्न आहेत की, त्यांचे लक्ष सर्वसामान्य नागरिकांकडे जातच नाही.