ब्रह्मपुरी (जि. चंद्रपूर) : शहरात दर रविवारी कृषी उत्पन्न बाजार समितीच्या आवारात भरणारा गुरांचा बाजार कोरोना आणि लॉकडाउनमुळे गेल्या चार महिन्यांपासून बंद आहे. त्यामुळे शेतकरी, व्यापारी व सर्वसामान्य माणसाचे जणू अर्थचक्र थांबले आहे.

लॉकडाउनमुळे रोजगार ठप्प असताना जनावरांची खरेदी-विक्री करून त्यातून पैसा उभारण्याचा मार्गही बंद झाला आहे. यापूर्वी जनावरांच्या खरेदी-विक्रीमध्ये गुंतविलेला पैसासुद्धा चार महिन्यांपासून अडकून पडला आहे.

शेतकऱ्यांची मोठी पंचाईत

कृषी उत्पन्न बाजार समितीच्या आवारात दररोज भाजीपाला गुजरी भरते. याच ठिकाणी गुरांचा बाजार भरत होता. मात्र, गेल्या चार महिन्यांपासून तो बंद आहे. त्यामुळे काही महिने जनावरांचे पालनपोषण करून खरीप हंगामाच्या तोंडावर विकणाऱ्या शेतकऱ्यांची मोठी पंचाईत झाली आहे.

काही शेतकरी वर्षभर जनावरांचे व्यवस्थित पालनपोषण करतात. खरीप हंगाम तोंडावर आला की जनावरे विकतात. पावसाळ्याच्या दिवसात जनावरांना बांधण्याची अडचण येत असते. त्यामुळेही काही शेतकरी जनावरे विकून टाकतात. परंतु कोरोनामुळे यावर्षी गुरांचा बाजार बंद असल्याने जनावरांना विकून शेती करणाऱ्या शेतकऱ्यांची तसेच जागेची अडचण असणाऱ्या शेतकऱ्यांची मोठी पंचाईत झाली आहे.

आर्थिक अडचणीला तोंड

लॉकडाउन होण्यापूर्वी ज्यांनी खरेदी-विक्रीचे व्यवहार केले होते. त्यांचा पैसा अडकून पडला असल्याने त्यांना आर्थिक अडचणीला तोंड द्यावे लागत आहे. जीवनावश्‍यक वस्तूंची आणि शेतीसाठी, घरगुती वापरासाठी लागणारी सर्व साहित्याची दुकाने सुरू आहेत. मात्र, गुरांचा बाजार अद्याप सुरू करण्यात आला नाही. त्यामुळे अनेकांचे अर्थचक्र थांबले आहे.

असं घडलंच कसं : आई-वडील कामावर तर बहीण मैत्रिणीकडे गेल्याने पूजा घरात एकटीच होती, मग...

लॉकडाउनचा परिणाम पथ्यावर

शहरातील गुरांचा बाजार जिल्ह्यात प्रसिद्ध आहे. या बाजारात चांगला भाव मिळत असल्याने जनावरांच्या खरेदी-विक्रीसाठी शेतकरी, सर्वसामान्य नागरिक, व्यापारी येथे येतात. गायी, म्हशी, शेळ्या, बोकड ही जनावरे खरिपापूर्वी बाजारात विकून पेरणीच्या कामासाठी पैसा उभा करण्याचा मार्ग अनेक शेतकरी अवलंब करतात. यावेळी लॉकडाउनमुळे गुरांचा बाजार भरलाच नाही.

(संपादन : दुलिराम रहांगडाले)