अकोला : लहान भावाला मारहाण केली म्हणून मनात राग धरून एका कुख्यात गुंडाला अकोट फैल परिसरातील चौघांनी रेल्वे स्थानक परिसरात चाकूने वार करीत ठार केले. ही घटना रविवारी मध्यरात्रीनंतर १ ते १.१५ वाजताच्या दरम्यान घडली. या प्रकरणी रामदासपेठ पोलिसांनी चौघांना अटक करून गुन्हा दाखल केला आहे. अनिल रताळ असे मृतक तरुणाचे नाव आहे. तो बस स्थानकामागील आंबेडकरनगरातील रहिवासी आहे.

पोलिसांनी दिलेल्या माहितीनुसार, काही दिवसांपूर्वी अनिलने बस स्थानकावरील कॅंटिनमध्ये अकोट फैलमधील रहिवासी राहुल ओंकार त्रिपाठी याच्या भावाला मारहाण केली होती. त्यामुळे राहुलने अनिलच्या विरोधात सिव्हिल लाईन्स पोलिस स्टेशनला तक्रार दिली होती.

ही तक्रार मागे घेण्यासाठी अनिल सातत्याने राहुलवर दबाव टाकत होता. रविवारी रात्रीही याबाबत चर्चा करण्यासाठीच अनिलने रेल्वे स्थानकावर राहुलला बोलाविले होते.

आधीच भावाला मारहाण, त्यात तक्रार मागे घेण्यासाठी दबाव टाकत असल्याने राग अनावर झालेल्या राहुलने मित्रांच्या मदतीने रेल्वे स्थानकावरील गेट क्रमांक दोनवरील हॉटेल प्रेसिडंटपुढे अनिलला गाठून त्याच्यावर वार केले. तो बचाव करण्याचा प्रयत्न करीत होता. याबाबत पोलिसांना माहिती मिळताच त्यांना धाव घेतली. त्यावेळी एक तरूण दुसऱ्याला हातात चाकू घेवून मारहाण करताना दिसला. त्याला पोलिसांनी ताब्यात घेतले.

रक्ताच्या थारोळ्यात पडलेल्या अनिलला पोलिसांनी सर्वोपचार रुग्णालयात दाखल केले. तेथे डॉक्टरांनी त्याला मृत घोषित केले.

अर्धा तासात चौघांना घटक

रामदासपेठ पोलिस व अकोट फैल पोलिसांनी मिळून आरोपींना अर्धा तासात चार आरोपींना अटक केली. त्यात मुख्य आरोपी राहुल ओंकार त्रिपाठीसह अमर उज्जैनवार, अभिषेक खांडगे, सोनू बनसोड (सर्व रा. अकोट फैल) यांना अटक केली. रामदासपेठ पोलिसांनी सहायक पोलिस निरीक्षक जितेश कानपुरे (आर्थिक गुन्हे शाखा) यांच्या फिर्यादीवरून आरोपीविरुद्ध भांदवि कलम ३०२, ३४ नुसार गुन्हा दाखल केला आहे.