अमरावती :  गुन्हा करून काही गुन्हेगार  हॉटेल, बार किंवा ढाब्यावर आश्रय घेतात. त्या पार्श्‍वभूमिवर पोलिस आयुक्त डॉ. आरती सिंग यांना काल रात्री अचानक काही हॉटेल, रेस्टॉरंट, ढाब्यावर अचानक भेट दिली असता मध्यरात्रीनंतरही वर्दळ सुरूच दिसली.

हेही वाचा - राष्ट्रसंत तुकडोजी महाराजांच्या प्रार्थना मंदिराचा वाद...

पोलिस आयुक्तांच्या अचानक भेटीमुळे संबंधित ठाणेदारांसह, ठाण्यातील कर्मचाऱ्यांची चांगलीच तारांबळ उडाली. शुक्रवारी (ता. 12) रात्री सीपींनी ही कारवाई केली. जिल्हा प्रशासनाने कोविड-19 च्या पार्श्वभूमीवर हॉटेल, बार, ढाबे, रेस्टॉरंट रात्री दहापर्यंतच ग्राहकांसाठी उघडे ठेवण्याची अनुमती दिली. परंतु, पंचवीस टक्के बार, रेस्टॉरंट, ढाबे किंवा हॉटेलमालक जिल्हाप्रशासनाने दिलेली गाइडलाइन पाळत नाही. त्यामुळे मध्यरात्रीपर्यंतही येथे वर्दळ सुरू असते.

हेही वाचा - आता मनपा कर्मचाऱ्यांना प्रत्येक शुक्रवारी सायकलवर येणे...

संबंधित ठाण्याच्या डीबीस्कॉडसह पोलिस निरीक्षकांना त्याबाबतची परिपूर्ण माहिती असतानाही काही आस्थापना संचालकांना त्यातून विशेष सूट दिली जाते. महत्वाची बाब म्हणजे पोलिस आयुक्तांनी शुक्रवारी (ता. 11) गुन्हेविषयक मासिक आढावा बैठकीमध्येच या मुद्याबाबतही पोलिस निरीक्षकांना सूचना केल्या होत्या. परंतु, गाडगेनगर हद्दीत पंचवटी, रहाटगाव व नांदगावपेठ परिसरात बरेच ढाबे, हॉटेल, बार रात्रीपर्यंत सुरूच होते. ग्राहकांचीही येथे वर्दळ झाली. परंतु, पोलिसांनी कारवाई टाळली. पोलिस आयुक्तांना माहिती मिळताच आधी त्यांनी परिसरात संबंधित ठिकाणी आधी भेटी देऊन खात्री केली. त्यानंतर दोन्ही ठाण्याच्या पोलिस निरीक्षकांना घटनास्थळी बोलावून पाहायला लावले. त्याचठिकाणी पोलिस आयुक्तांनी संबंधितांना सुनावले.