कोदामेंढी : दारूड्या पतीने पत्नीचा गळा आवळून खून केल्यानंतर तिने आत्महत्या केल्याचा बणाव करण्यासाठी मृतदेह फासावर लटकविला. मात्र, शवविच्छेदन अहवालात खून केल्याचे निष्पन्न झाल्यावर आरोपी पतीवर गुन्हा नोंदवून शनिवारी आरोली पोलिसांनी त्यास अटक केली आहे. रोशनी किशोर दिवटे (वय 28) असे मृत महिलेचे नाव आहे.
मौदा तालुक्‍यातील अडेगाव येथे राहणाऱ्या किशोर विठ्ठल दिवटे (वय 36) यास दारूचे व्यसन आहे. शुक्रवारी दुपारी किशोर व रोशनी यांच्यात भांडण झाले. दारूच्या नशेत किशोरने पत्नी रोशनीचा गळा आवळला. यात तिचा मृत्यू झाला. त्यामुळे त्याने तिने गळफास लावून आत्महत्या केल्याचा बनाव केला.
याकरिता किशोरने तिच्या गळ्यात दोरीचा फास लावून लटकवून ठेवले. यानंतर त्याने तिला उपचाराकरिता कोदामेंढी येथील प्राथमिक आरोग्य केंद्रात आणले. मात्र, डॉक्‍टरांनी तिला मृत घोषित केले. अरोली पोलिसांनी मृतदेहाला शवविच्छेदनासाठी रामटेक येथे पाठविल्यानंतर रोशनी हिच्या गळ्याभोवती वळ असल्याने पोलिसांचा संशय बळावला. उत्तरीय तपासणीनंतर रोशनी हिचा गळा दाबून खून करण्यात आल्याचे निष्पन्न झाले. शवविच्छेदन अहवालावरून पोलिसांनी आरोपी पती किशोर दिवटे याच्यावर खुनाचा गुन्हा दाखल करून अटक केली. या प्रकरणी मृत रोशनीचा भाऊ नीलकंठ झितरुजी राऊत (रा. गांगनेर) याने अरोली पोलिसांत तक्रार केली आहे. पुढील तपास ठाणेदार विवेक सोनवणे करीत आहेत.  
मारहाण न करण्याचे हमीपत्र
किशोर बैलबाजारात दलाली करायचा. दिवसरात्र दारूच्या नशेत असल्याने त्याचे पत्नीशी नेहमीच भांडण व्हायचे. यातून काही दिवसांपूर्वी पत्नी रोशनी मुला-मुलीसह माहेरी गेली होती. तिला आणण्यासाठी किशोर गेला. रोशनीच्या माहेरच्यांनी प्रकरण तंटामुक्ती समितीसमोर आणले. यापुढे पत्नीला शिवीगाळ व मारहाण करणार नाही व असे झाल्यास मी जबाबदार राहील, असे हमीपत्र किशोरने 20 मार्च रोजी लिहून दिले होते.