आर्णी (जि. यवतमाळ) : प्रसूतीसाठी यवतमाळ येथे आणत असताना रुग्णवाहिकेतच महिलेची प्रसूती झाली. मात्र, नवजात शिशूसह महिलेचा यवतमाळ येथील वैद्यकीय महाविद्यालयात मृत्यू झाला. ही घटना सोमवारी (ता. १८) रात्री १२ वाजता घडली. मनीषा उमेश पिंपळे (वय २६, रा. लोनबेहळ) असे मृत महिलेचे नाव आहे. या घटनेने गावात हळहळ व्यक्त होत आहे.

उमेश पिंपळे व पत्नी मनीषा तीन चिमुकल्यांसह दोन महिन्यांपासून रोजमजुरी व सोयाबीन काढणीसाठी पांढरकवडा तालुक्यात गेले होते. पत्नी गर्भवती असल्याने प्रसूतीसाठी रविवारी गावी परत आले. सोमवारी सकाळी ११ वाजता लोणबेहळ येथील प्राथमिक आरोग्य केंद्रात प्रसूतीसाठी दाखल करण्यात आले. दुपारी चारपर्यंत प्रसूती होईल, असे डॉक्टरांकडून सांगण्यात आले. मात्र, रात्री आठ वाजेपर्यंत प्रसूती झाली नाही. त्यामुळे पुढील उपचारासाठी महिलेला यवतमाळला हलविण्याचा सल्ला डॉक्टरांनी दिला.

रुग्णवाहिकेत मनीषासह तिचे नातेवाईक व प्राथमिक आरोग्य केंद्राचे वैद्यकीय अधिकारी डॉ. संतोष कांबळे हेदेखील आले. रात्री साडेनऊ वाजता रुग्णवाहिकेतच जवळा गावाजवळ महिलेची प्रसूती झाली. यावेळी नवजात शिशूसह महिलेला वैद्यकीय महाविद्यालयात दाखल केले असता डॉक्टरांनी बाळाला मृत घोषित केले.

महिलेवर उपचार सुरू असताना मृत्यू झाला. मंगळवारी वैद्यकीय महाविद्यालयात शवविच्छेदन झाल्यावर शोकाकुल वातावरणात लोणबेहळ येथे अंत्यसंस्कार करण्यात आले. महिलेच्या पश्‍चात पती उमेश पिंपळे, मुलगी खुशी (वय सहा), प्रिया (वय चार), मुलगा यश (वय दोन) असा आप्तपरिवार आहे.