नागपूर : नवोदय को-ऑपरेटिव्ह बॅंकेतील 38 कोटींच्या गैरव्यवहार प्रकरणी अडचणीत आलेले बॅंकेचे तत्कालीन अध्यक्ष माजी आमदार अशोक शंकरराव धवड, त्यांची पत्नी किरण धवड यांच्यासह एकूण पाच जणांना अटकपूर्व जामीन विशेष सत्र न्यायालयाने नाकारला आहे. नाना देवलकर, कृष्णराव निरुळकर आणि डॉ. प्रभाकर धानोरकर अशी जामीन नाकारलेल्या इतर तीन संचालकांची नावे आहेत. 2010 ते 2015 या कालावधीत बॅंकेचे तत्कालीन संचालक मंडळ, पदाधिकाऱ्यांनी ठराविक कर्जदारांना विनाकारण कर्ज दिले. तसेच काही कर्जदारांकडे थकबाकी असतानाही त्यांना ना हरकत प्रमाणपत्र देण्यात येऊन त्यांनी तारण ठेवलेल्या मालमत्तेचे दस्तऐवज परत करण्यात आले. काही वादग्रस्त मालमत्ता तारण ठेवून संचालक मंडळाने कर्ज दिले. संचालक आणि पदाधिकाऱ्यांनी बॅंकेतून पैशांची उचल केली, तसेच रिझर्व्ह बॅंकेने निर्बंध घातल्यानंतरही पदधिकाऱ्यांनी बॅंकेचे आर्थिक व्यवहार सुरूच ठेवले. अशाप्रकारे आरोपींनी 38 कोटी 75 लाख 20 हजार 641 रुपयांचा गैरव्यवहार केला, असा आरोप आहे. सहकारी संस्थेचे जिल्हा विशेष लेखापरीक्षक (भंडारा) श्रीकांत श्रीधर सुपे यांच्या अंकेक्षण अहवालात हा प्रकार उघडकीस आल्यानंतर त्यांनी पोलिसांकडे तक्रार दिली. आर्थिक गुन्हे शाखेच्या मार्गदर्शनात धंतोली पोलिस ठाण्यात आरोपींविरुद्ध गुन्हे दाखल करण्यात आले. आरोपींमध्ये धवड यांच्यासह जवळपास 40 आरोपी आहेत. त्यापैकी अनेकांनी अटकपूर्व जामिनासाठी विशेष सत्र न्यायालयात धाव घेतली आहे. या अर्जांवर न्या. सुनील पाटील यांच्यासमक्ष सुनावणी झाली. न्यायालयाने सर्व पक्षांची बाजू ऐकल्यानंतर पाच जणांना अटकपूर्व जामीन नाकारत अर्ज फेटाळला. इतर आरोपींच्या अर्जांवर उद्या शुक्रवारी आदेश होणार आहे. आरोपींतर्फे ऍड. आंबीलवाडे आणि ऍड. बी. एम. करडे यांनी बाजू मांडली.