वाशीम - जिल्हा आपत्ती व्यवस्थापन प्राधिकरण जिल्हाधिकारी कार्यालय यांच्या वतीने उष्मालाटेबाबत एक दिवसीय कार्यशाळा वाकाटक सभागृह येथे आयोजित करण्यात आली होती. या कार्यशाळेत विविध विभागासह स्वयंसेवी संस्थांची उपस्थिती होती.

कार्यशाळा कार्यक्रमाच्या अध्यक्षस्थानी मुख्य कार्यकारी अधिकारी वैभव वाघमारे हे होते. तर उद्घाटक म्हणून निवासी उपजिल्हाधिकारी विश्वनाथ वि.घुगे, प्रमुख अतिथी म्हणून जिल्हा आरोग्य अधिकारी डॉ. सुहास कोरे, वाशीमचे तहसीलदार निलेश पळसकर, मालेगाव तहसीलदार दिपक पुंडे, निवासी वैद्यकीय अधिकारी पराग राठोड, यांची उपस्थिती होती.

सदर कार्यशाळेला राज्य स्तरावरील व्याख्याते म्हणून डॉ. योगश्री सोनवणे, डॉ. प्रविणकुमार, निलेश मानकर यांची उपस्थिती होती. सदर कार्यशाळेचे उद्घाटन निवासी उपजिल्हाधिकारी विश्वनाथ वि. घुगे यांनी केले. कार्यशाळेमध्ये अध्यक्षीय मार्गदर्शन मुख्य कार्यकारी अधिकारी वैभव वाघमारे यांनी केले.

उन्हापासून बचाव करण्यासाठी प्रत्येकाने काळजी घ्यावी. याबाबत सर्व यंत्रणांनी सज्ज राहावे, असे आवाहन त्यांनी केले. सदर कार्यशाळेला अपर जिल्हाधिकारी शहाजी पवार, उपजिल्हाधिकारी रोहयो कैलास देवरे, भोसले , जिल्हा शल्य चिकित्सक डॉ. अनिल कावरखे यांनी भेटी दिल्यात.

या कार्यशाळेत व्याख्याते म्हणून डॉ. योगश्री सोनवणे यांनी उष्णतेच्या लाटेची पूर्वतयारी कशी करावी या संबंधित मार्गदर्शन केले. तसेच, उष्णतेशी संबंधित आजारांचे होणारे सर्वेक्षण, उष्णतेसंबंधित घ्यावयाची काळजी, उष्णतेशी संबंधित सामान्य प्रथमोपचार, पर्यावरणपूरक हरित आणि पायाभूत सुविधा पोहचविण्याबाबत व उन्हाळ्यात अन्नासंबंधित घ्यावयाच्या काळजीबाबत मार्गदर्शन केले.

सदर कार्यशाळेच्या कार्यक्रमाचे प्रास्ताविक, सूत्रसंचालन व आभार प्रदर्शन जिल्हा आपत्ती व्यवस्थापन अधिकारी शाहू भगत यांनी केले. सदर कार्यशाळेला महसूल विभाग, पोलीस विभाग, आरोग्य विभाग, कृषी विभाग, ग्राम विकास विभाग आदी विभागातील पदाधिकाऱ्यांचा सहभाग होता.

सदर कार्यशाळेच्या यशस्वितेसाठी जिल्हा आपत्ती व्यवस्थापन अधिकारी शाहू भगत, सहाय्यक अधीक्षक अनिल घोडे, महसूल सहाय्यक विनोद मारवाडी, श्रीकांत वडोदे, मारोती खंडारे, गजानन मेसरे, अमोल काळे एनसीसी अधिकारी आदींनी परिश्रम घेतले.