धानोरा (जि. गडचिरोली) - बिबट्याने अचानक हल्ला केलेल्या महिलेच्या मदतीला २ कुत्रे धावत आले असून त्यांनी बिबट्याला पिटाळून लावत या महिलेचे प्राण वाचविले. प्रेमीला श्यामराव किरंगे, असे जखमी महिलेचे नाव आहे.

उत्तर धानोरा परीक्षेत्रातील मुस्का उपक्षेत्रात बांधोना गावातील प्रेमीला किरंगे शुक्रवार (ता. १) सकाळी ६ वाजताच्या सुमारास शौचाकरिता जंगलात गेली असता जंगलात दबा धरून बसलेल्या बिबट्याने या महिलेवर हल्ला केला. महीलेने प्रतीकार केला व सोबत असलेले २ कुत्रे बिबट्यावर तुटुन पडले. त्यामुळे महिलेला सोडून बिबट जंगलात पळून गेला.

कुत्र्यांमुळे प्रेमीला किरंगे या महीलेचे प्राण वाचले. वनपरिक्षेत्र अधिकारी वसंत मेडेवार, क्षेत्र सहाय्यक मुस्का करेवार, वनरक्षक प्रवीण मेश्राम, विकास कुमरे यांनी घटनास्थळी भेट देऊन जखमी महिलेची विचारपूस करून उपचाराकरीता प्राथमिक आरोग्य केंद्र आरमोरी येथे हलविले. परंतु महिला गंभीर स्वरूपात जखमी असल्याने जिल्हा सामान्य रुग्णालय गडचिरोली येथे हलविण्यात आले. जखमी महिलेस वनपरीक्षेत्र अधिकारी वसंत मेडेवार यांनी उपचाराकरीता मदत केली.