गिरड (जि. वर्धा) : कुटुंबीयांचे भोजन आटोपले आणि ऐन झोपण्याच्या वेळी घरात नागोबाचे दर्शन झाले अन्‌ सदस्यांची तारांबळ उडाली. घरात नागोबाच्या दहशतीने परिवाराला रात्र घराबाहेर रस्त्यावर काढावी लागली. शेवटी तब्बल आठ तासांनंतर सर्पमित्राच्या मदतीने या नागोबाच्या दहशतीतून कुटुंबीयांची मुक्तता झाली. ही घटना समुद्रपूर तालुक्‍यातील शिवणफळ या गावात घडली.

शिवणफळ येथील मुरलीधर शेळके यांच्या घरात रात्री ९ वाजताच्या दरम्यान नागोबाचे दर्शन झाले. दरम्यान, या नागोबाला बघताच कुटुंबातील सदस्यांची भंबेरी उडाली. गावकऱ्यांनी या नागाला बघण्यासाठी मोठी गर्दी केली होती.

जाणून घ्या - प्रेम एकीवर अन् साक्षगंध दुसरीशी; विवाहित प्रेयसीवर बलात्कार तर होणाऱ्या पत्नीला दिला दगा

काहींनी या नागोबाला ठार करण्याचासुद्धा पवित्रा घेतला. मात्र, नागोबा एकाच ठिकाणी फणा काढून उभा असल्याने साप मारणाऱ्या बहाद्दरांची हुशारी चालली नाही. सापाला हाकलण्यासाठी विविध उपाय करण्यात आले. असे असले तरी नागराज आपली जागा सोडायला तयार नव्हते.

याच काळात गिरड येथील सर्पमित्रांशी संपर्क साधण्यात आला. मात्र, वेळीच सर्पमित्र उपलब्ध न झाल्याने शेळके कुटुंबीयांना हताश होऊन रात्र घराबाहेर रस्त्यावर काढावी लागली. सकाळी सहा वाजताच्या सुमारास मोहगाव येथील सर्पमित्र खुशाल शेळके, अमित शेळके, पवन झाडे, यांनी अर्थ्या तासाच्या परिश्रमातून या नागाला जेरबंद करून आठ तासांच्या दहशतीतून शेळके कुटुंबीयांची सुटका केली. हा नाग पाच फूट पाच इंचीचा होता. त्या सापाला सर्पमित्रांनी मोहगाव येथील जंगलात नेऊन सोडले.