यवतमाळ : कोरोना विषाणूची साखळी तोडण्यासाठी जिल्हा प्रशासनाने यवतमाळ शहरासह इतर तीन तालुक्‍यांत शनिवार (ता. 25) ते शुक्रवार (ता. 31) पर्यंत लॉकडाउनचा निर्णय घेतला आहे. त्यामुळे नागरिकांना आठवडाभर घराबाहेर पडता येणार नाही. मात्र शुक्रवारी (ता.24) सकाळी दहा वाजतापासूनच बाजारपेठेत ग्राहकांची गर्दी उसळली. कुठेही नियमांचे पालन करण्यात आले नाही. यामुळे लॉकडाउनपुढे कोरोनाचे भय थिटे पडल्याचे चित्र दिसून आले.

कोरोनाबाधितांच्या संख्येत झपाट्याने वाढ होत आहे. शहरी भागापुरता मर्यादित असलेल्या कोरोना विषाणूने आता ग्रामीण भागातही चांगलेच पाय रोवले आहे. यवतमाळ शहरातही कोरोनाबाधित झपाट्याने आढळून येत आहेत.

पहिल्या टप्प्यातील लॉकडाउननंतर बाजारपेठेत खरेदीसाठी ग्राहकांना ठराविक वेळेत खरेदीची मुभा देण्यात आली होती. त्या वेळेत बाजारपेठेत गर्दी उसळत असल्याने जिल्हा प्रशासनाने आठवडाभर लॉकडाउनचा निर्णय घेतला.

बाजारपेठेत चिक्कार गर्दी

ग्राहकांची असुविधा टाळण्यासाठी शुक्रवारी सकाळी दहा ते दुपारी पाच वाजेपर्यंत बाजारपेठ सुरू ठेवण्यात आली होती. जणूकाही आपला आजचाच दिवस अखेरचा आहे, असे समजून नागरिकांनी सर्वच साहित्य खरेदीसाठी बाजारपेठेत चिक्कार गर्दी केली होती. या दरम्यान कुठेही सोशल डिस्टन्सिंगचे पालन करण्यात आले नाही. किराणा दुकान, पेट्रोलपंप, भाजीपाला, कपडा मार्केट आदी प्रमुख दुकानांत खरेदीसाठी ग्राहकांच्या रांगा लागल्या होत्या. रस्त्यावर असलेली गर्दी बघून दिवाळीसणाच्या खरेदीची आठवण झाली. आठ दिवस लॉकडाउन राहणार आहे. मात्र, थोडी मुभा मिळताच नागरिक घराबाहेर निघून कोरोनाला आपल्या घरी घेऊन गेल्याची शक्‍यता नाकारता येत नाही.

खरेदी नेमकी कशाची

आठवडाभर लागणाऱ्या साहित्याची खरेदी नागरिकांनी केली. किराणा दुकानापुढे ग्राहकांना वेटिंगवर राहावे लागले. या कालावधीत सारेच नागरिक बेफिकीर दिसून आले. गरज नसताना एका घरातील तीन-तीन सदस्य दुचाकी घेऊन बाजारपेठेत आले. वाहनांच्या गर्दीमुळे वाहतूक व्यवस्थादेखील विस्कळित झाली होती. ग्राहकांनी किराणासोबत कोरोनाचीही खरेदी केली नाही ना, असा उपहासात्मक प्रश्‍न निर्माण झाला आहे.

जाणून घ्या : प्रधानमंत्री आवास योजनेतील पावणेदोन लाख घरकुल लाभार्थ्यांची आधार नोंदणी

वाहनात पेट्रोल टाकण्याची घाई

आठवडाभर नागरिकांना घरीच थांबावे लागणार आहे. अत्यावश्‍यक कामाशिवाय कुठेही जाता येणार नाही. तरीही आपल्याला जणूकाही युद्घावरच जायचे आहे. असा समज करून दुचाकी व चारचाकी चालकांनी वाहनाची टाकी पेट्रोलने हाऊसफुल्ल भरून टाकली. स्टॉक संपेल या भीतीने सकाळी दहावाजेपासूनच पेट्रोलपंपावर वाहनांच्या रांगा लागल्या होत्या. इतकी बेपर्वाई यवतमाळ शहरात पाहावयास मिळाली.

(संपादन : दुलिराम रहांगडाले)