भद्रावती (जि.चंद्रपुर) : जगासह देशात व राज्यात कोरोनाचा मोठ्या झपाट्याने प्रसार होत असल्याने तालुक्‍यात संचारबंदीच्या काळात नागरिकांना वारंवार सूचना करून सुद्धा विनाकारण मोटारसायकलने रस्त्यावर उतरणाऱ्यांना भद्रावती पोलिसांनी त्यांच्या कपाळावर टिका लाऊन आरती ओवाळली व त्यांच्या हाती बेशरमाचे वृक्ष देऊन आम्ही कधी सुधारणार नाही, असे म्हणत बेशरमासारखे वृक्ष घरी लावा असा अनोखा उपक्रम भद्रावती पोलिसांनी हाती घेतला.

अवश्य वाचा - नागपुरात कोरोना वाढला; हे परिसर केले ‘सील’

जिल्हयात कोरोनाचा एकही रुग्ण आढळला नसल्याने खबरदारीचा उपाय म्हणून प्रशासन सज्ज असताना संचारबंदीच्या काळात संपूर्ण शहर बंद असताना विनाकारण बाहेर निघणाऱ्यांवर वेगवेगळे प्रयोग अनुभवले परंतु त्यांच्यावर कोणताही प्रतिकूल परिणाम दिसून येत नसल्याने ठाणेदार सुनील सिंग पवार यांच्या मार्गदर्शनात सपोनि सुधीर वर्मा, पोऊनी जितेंद्र ठाकूर, वाहतूक नियंत्रक तनोज टेकाम, शंकर पप्पूलवार, राजेश वराडे, भीमराव पडोळे, सुषमा पवार, संजय मालेकर, अच्युत नांदेकर यांनी वेगवेगळ्या चौकात दुचाकी चालकांना बेशरमाचे वृक्ष हातात दिले त्यांची आरती ओवाळून ते वृक्ष घरी लावून 'मी कदापि सुधारणार नाही, या वृक्षाप्रमाणेच बेशरम राहील', असे म्हणून स्वागत करणाऱ्या 25 दुचाकी चालकावर कारवाई करण्यात आली.