इंझोरी (वाशीम) : कुटुंबातील सर्वजण शेतात कामावर गेल्यानंतर घरी एकट्याच असलेल्या शेतकऱ्याने गळफास लावून आत्महत्या केली. ही घटना बुधवारी (ता.22) मानोरा तालुक्‍यातील इंझोरी येथे उघडकीस आली. या प्रकरणी मानोरा पोलिसांनी घटनास्थळी धाव घेऊन पंचनामा केला.

या घटनेबाबत अधिक माहिती अशी की, येथील दत्ता रामचंद्र हळदे (वय60) यांच्या कुटुंबाकडे सामाईक 11 एकर शेती आहे. त्यापैकी त्यांच्यानावे पाच एकर शेती आहे. अशातच आज सकाळी घरातील सर्वजण शेतात कामाकरिता गेल्यानंतर, त्यांनी राहत्या घरी गळफास लावून आत्महत्या केली. ही बाब सायंकाळी पाच वाजता कुटुंबातील सदस्य घरी आल्यानंतर त्यांच्या लक्षात आली. या घटनेबाबत पोलिसांना माहिती मिळताच त्यांनी घटनास्थळ गाठून पंचनामा केला. मात्र, आत्महत्येचे स्पष्ट कारण समजू शकले नाही. सदरील आत्महत्या नापिकीच्या नैराश्‍यातून केली असावी, असा अंदाज व्यक्त केला जात आहे. त्यांच्या पश्‍चात पत्नी, मुलगा, सून असे कुटुंब आहे. या घटनेमुळे गाव परिसरात सर्वत्र हळहळ व्यक्त केल्या जात आहे.