ब्रह्मपुरी (जि. चंद्रपूर) - धानाला खत देण्यासाठी शेतात गेलेल्या एका शेतकऱ्यावर वाघाने हल्ला करून ठार केले. ही घटना मंगळवारी (ता. १६) दुधवाही गावापासून एक किलोमीटर अंतरावर असलेल्या शेतशिवारात घडली. मृत शेतकऱ्याचे नाव मुखरू पैकू राऊत (वय ६० रा. दुधवाही) असे आहे.

ब्रम्हपुरी तालुका मुख्यालयापासून चार किमी अंतरावर असलेल्या दुधवाही येथील मुखरू राऊत यांचे शेत गावापासून एक किलोमीटर अंतरावर जंगलात आहे. त्यांनी शेतात धानपीक लावले होते. धानाला खत देण्यासाठी ते मंगळवारी (ता. १६) सकाळी शेतात गेले. बराच वेळ होऊनही ते घरी न परतल्याने त्यांचा मुलगा नरेश हा वडीलांच्या शोधात शेतावर गेला.

तेव्हा वडीलांचा मृतदेह लचके तोडलेल्या अवस्थेत आढळून आला. त्यानंतर त्याने गावातील नागरिकांना या घटनेची माहिती दिली. माहिती मिळताच गावकरी शेताकडे धाऊन आले. घटनेची माहिती मिळताच वनविभाग, पोलिस कर्मचारीही आले. घटनेचा पंचनामा करून मृतदेह शवविच्छेदनासाठी ब्रम्हपुरी येथील ग्रामीण रुग्णालयात दाखल करण्यात आले.

पदमापुरात वाघाच्या हल्ल्यात गुराखी जखमी

ब्रह्मपुरी- गावालगत शेळ्या-गायी चराईसाठी घेऊन गेलेल्या गुराख्यावर वाघाने हल्ला करून जखमी केले. ही घटना पदमापुर गावापासून एक किमी अंतरावर मंगळवारी (ता. १६) दुपारी दोन वाजताच्या सुमारास घडली. जखमी गुराख्याचे नाव प्रभाकर मडावी (वय ४५ रा. पदमापूर) असे आहे. तालुक्यातील शेवटच्या टोकावर जंगलव्याप्त भागात वसलेल्या पदमापुर येथील प्रभाकर मडावी हे शेळ्या व गायी चराईसाठी जंगलालगत गेले होते. तेव्हा दबा धरून बसलेल्या वाघाने अचानक त्यांच्यावर हल्ला केला. तेव्हा गुराख्याने प्रतिकार करून स्वतःचा जीव वाचवला. यात ते गंभीर जखमी झाले असून, त्यांना ब्रह्मपुरी येथील ग्रामीण रुग्णालयात उपचारासाठी दाखल करण्यात आले आहे.