कोरपना (जि. चंद्रपूर) : एकोणवीस एकर शेतात नवनवीन प्रयोग करणाऱ्या बोरी नवेगाव येथील शेतकरी साईनाथ कुंभारे यांनी यावर्षी बटाट्याचे पीक घेतले. उत्तम व्यवस्थापन, कृषी विभागाच्या वेळोवेळी मिळणाऱ्या मार्गदर्शनाने त्यांच्या शेतात चक्क एकरी साठ ते सत्तर क्विंटल बटाट्याचे उत्पादन झाले आहे. प्रायोगिक तत्त्वावर केलेल्या प्रयोगाला भरघोस यश संपादन केले आहे. 

हेही वाचा - भाजपकडून महापालिका निवडणुकीची जोरदार तयारी, अर्थसंकल्पात नागपूर मेट्रोसाठी ५ हजार ९७६ कोटी

तालुक्‍यात आदर्श शेतकऱ्यांचा एक गट आहे. ते आपल्या शेतात नवनवीन प्रयोग करतात. तालुक्‍यातील शेतकऱ्यांना प्रोत्साहन देण्याचे काम या गटाकडून सुरू आहे. या गटाने आजवर आपल्या शेतात टरबूज, खरबूज, हळद, आले, ऊस, केळी यांसह अन्य पिके घेतली. ते बघून तालुक्‍यातील अन्य शेतकऱ्यांनी असेच प्रयोग आपल्या शेतात केले. तालुक्‍यात कापूस, सोयाबीन, मिरची, गहू हे मुख्य पीक आहे. आता शेतात पिकांच्या नवनवीन प्रयोगाला चालना मिळत असल्याने शेतकरीसुद्धा नवनवीन पिके घेत आहेत. असाच एक प्रयोग तालुक्‍यातील बोरी नवेगाव येथील आदर्श शेतकरी, सोनुर्ली येथील महात्मा गांधी विज्ञान महाविद्यालयातील प्राध्यापक साईनाथ कुंभारे यांनी केला. साईनाथ दरवर्षी आपल्या १९ एकर शेतात नवनवीन प्रयोग करतात. यंदा त्यांनी शेतात टरबूज व खरबुजाची लागवड केली. लातुर जिल्ह्यात शेतकरी बटाट्याचे पीक घेतात. साईनाथ कुंभारे यांनीही शेतात बटाट्याचे पीक घेण्याचा निर्णय घेतला. त्याची त्यांनी संपूर्ण माहिती घेतली. लातूरहून बटाट्याचे बेने त्यांनी आणले. साधारणपणे ऑक्‍टोबरमध्ये त्याची लागवड केली. अवघ्या चार महिन्यांत एकरी ६० ते ७० क्विंटल बटाट्याचे उत्पादन त्यांनी घेतले. 

हेही वाचा - मन सुन्न करणारी घटना : आई-वडिलांनी टोकाच्या निर्णयात मुलीलाही घेतले सोबत; जड मनाने घेतली नदीत उडी

बटाट्याचे उत्पादन घेण्यासाठी एकरी चाळीस हजार रुपयांचा खर्च त्यांना आला. शेतातील बटाटा साईनाथ कुंभारे मोठ्या हॉटेलमध्ये विकत आहेत. हेच उत्पादन पंधरा दिवस अगोदर निघाले असते तर बटाट्याला चांगला भाव मिळाला असता, असे कुंभारे यांनी 'सकाळ'शी बोलताना सांगितले.