राजुरा (जि. चंद्रपूर): कापसाच्या पिकांवर मोठ्या प्रमाणात गुलाबी बोंडअळीचा प्रादुर्भाव झाला आहे. त्यामुळे हताश झालेल्या शेतकऱ्याने २ एकरातील कापसाच्या पिकावर ट्रॅक्टर फिरविला. गुलाबी बोंड अळीमुळे शेतकऱ्याला नाइलाजाने कपाशीचे पीक काढावे लागले. यात शेतकऱ्याचे मोठे आर्थिक नुकसान झाले आहे.

राजुरा तालुक्यातील कोहपरा येथील शेतकरी नितीन श्रीकृष्ण पिंगे यांनी आपल्या शेतात दोन एकरामध्ये कापसाच्या पिकाची लागवड केली होती. कापूस हे शेतकऱ्यांचे नगदी पीक असल्याने  राजुरा तालुक्यातील बहुतांश शेतकऱ्यांनी कापसाची लागवड केली होती. मात्र, ऐन कापूस काढण्याच्या वेळी कापसावर गुलाबी बोंडअळी व बोंडसड आल्याने शेतकरी हताश झाले आहेत. त्यामुळे कापसाचे पीकच ट्रॅक्टरच्या सहाय्याने काढून टाकले. एकीकडे परतीच्या पावसाने पिकांचे नुकसान केले. आता दुसरीकडे हाती येणारे पीक डोळ्यांदेखत गुलाबी बोंड अळीमुळे उद्धवस्त झाले आहे. खरीप हंगामातील कापूस पिकावर शेतकऱ्याने मोठ्या प्रमाणात खर्च केला होता. आता कापूस काढण्याचा काळ आला असतानाच अचानक कापूस पिकांवर गुलाबी बोंडअळीचा प्रादुर्भाव झाला आहे. त्यामुळे कापसाचे अतोनात नुकसान झाले आहे. खर्चही भरून निघणार नाही, अशी परिस्थिती निर्माण झाली आहे. खरीप हंगामाच्या सुरुवातीला शेतकऱ्याने कापूस पिकावर अतोनात खर्च केला होता. 

हेही वाचा - पर्यटकांची पेंचकडे धाव, नेमक्या कोणत्या प्रवेशद्वारावरील पर्यटकांना होतेय वाघाचे दर्शन?

दिवाळीच्या तोंडावर आर्थिक चणचण -
दिवाळी ऐन तोंडावर आली आहे. सणासुदीचे दिवस आनंदात जावे, असे वाटत असतानाच कापसाच्या पिकांवर गुलाबी बोंडअळीने आक्रमण केल्यामुळे हताश झालेल्या शेतकऱ्याने कापसाच्या पिकांवर ट्रॅक्टर फिरविला. बोंड अळीमुळे पीक उद्ध्वस्त झाल्याने शेतकऱ्यांची दिवाळी अंधारात जाण्याची दाट शक्यता आहे. राजुरा तालुक्यात बोंडअळीचा प्रादुर्भाव मोठ्या प्रमाणात झाल्याने कापसाचे नुकसान झाले आहे.

हेही वाचा - धक्कादायक! अमरावतीत एकाच महिन्यात दगावली १७ बालके

दोन एकर शेतात कपाशीची लागवड केली होती. सुरुवातीपासून पिकांवर अतोनात खर्च केला होता. मात्र, कापसावर अचानक गुलाबी बोंडअळी व बोंडसडचा प्रादुर्भाव झाल्याने २ एकरातील कापसाच्या पिकावर ट्रॅक्टर फिरवून पीक काढून टाकले आहे. बोंडअळीमुळे शेतीचे प्रचंड नुकसान झाले आहे.
-नितीन पिंगे, नुकसानग्रस्त शेतकरी, कोहपरा