साकोली (जि. भंडारा) : मुदतीत धान खरेदी होत नसल्याने आधारभूत धान खरेदी केंद्राची मुदतवाढ करण्यात यावी, या मागणीसाठी सोमवारी साकोली तालुक्‍यातील सुमारे ७० शेतकऱ्यांनी साकोली तहसील कार्यालयामध्ये ठिय्या दिला. तहसीलदारांनी मुदत वाढवून देण्याचे आश्‍वासन दिल्यावर आंदोलन मागे घेण्यात आले.

मार्केटिंग फेडरेशनच्या वतीने जिल्ह्यात अनेक आधारभूत धान खरेदी केंद्र सुरू करण्यात आले आहेत. मात्र, ३१ मार्चनंतर हे केंद्र बंद होणार आहेत. तालुक्‍यातील अनेक शेतकऱ्यांचे धान अद्याप खरेदी करण्यात आलेले नाहीत. धानखरेदीला केवळ दहा दिवस उरले असताना अनेक केंद्रांवर बारदाना उपलब्ध करून दिला नाही. त्यामुळे खरेदी केंद्र बंद करण्यात आले होते. तसेच काही ठिकाणी गोडाऊन हाउसफुल झाल्याने दीड महिन्यापासून खरेदी बंद करण्यात आलेली आहे.

पत्नीच्या अनैतिक संबंधातून सेवानिवृत्त जवानाचा खून; पती लवकर घरी आल्याने घडला थरार

ऑनलाइन प्रक्रिया राबविल्याने धान खरेदी करताना अनेक अडचणी निर्माण झाल्या. या सर्व कारणांमुळे शेतकऱ्यांना धान विक्रीची अडचण निर्माण झाली. त्यामुळे एक महिन्याची मुदतवाढ द्यावी, अशी मागणी शेतकऱ्यांनी केली आहे. खरेदी केंद्रातून ३१ मार्चच्या मुदतीत धानखरेदी होत नसल्याने या आधारभूत धान खरेदी केंद्राची मुदतवाढ करण्यात यावी या मागणीसाठी सोमवारी साकोली तालुक्‍यातील सुमारे ७० शेतकऱ्यांनी साकोली तहसील कार्यालयामध्ये ठिय्या आंदोलन केले.

शेवटी तहसीलदारांनी दोन दिवसांची मुदत वाढवून या मागणीच्या संदर्भात कारवाई करण्याचे आश्वासन दिल्याने शेतकऱ्यांनी आंदोलन मागे घेतले. यावेळी भाजप किसान आघाडीचे जिल्हाध्यक्ष अविनाश ब्राह्मणकर, बाजार समितीचे संचालक मनीष कापगते, घनश्‍याम पारधी, सरपंच सुधाकर हटवार, पवन कुमार शेंडे, विश्वजित पडोळे यांच्यासह अनेक शेतकरी उपस्थित होते.