चंद्रपूर : वाघाचे दात आणि नखांची तस्करी करणाऱ्या पाच जणांना दक्षिण उमरेड वनपरिक्षेत्राच्या पथकाने सोमवारी (ता. २३) अटक केली. आरोपी नागभीड तालुक्यातील आहेत. त्यांच्याकडून सहा दात, १८ नखे जप्त करण्यात आली. आरोपींनी नागभीड वनपरिक्षेत्रातील आलेवाहीत क्षेत्रात वाघाची शिकार केली.

याप्रकरणी वनविभागाने ताराचंद महादेव नेवारे (वय २४, रा. खडकाळा), दिनेश नकटू कुंभले (३०, रा. वाढोणा), अजय राजू भानारकर (वय २४, रा. वाढोणा), प्रेमचंद वाघाडे ( वय ५०, रा. सोनापूर तुकूम) आणि राजू कुळमेथे (वय ३८, रा. खडकाळा) यांना अटक करण्यात आली. नागपूर वनविभागाच्या पथकाला उमरेड बसस्थानकाजवळ वाघाच्या दातांची विक्री होणार असल्याची माहिती मिळाली होती. याच माहितीच्या आधारे वनविभागातील दक्षिण उमरेड वनपरिक्षेत्राच्या पथकाने बसस्थानकाजवळ सापळा रचला.

याचदरम्यान काहीजण बसस्थानक परिसरात संशयितस्पद फिरताना आढळून आले. वनविभागाच्या पथकाने आरोपींना अटक करून त्यांच्याकडून सहा दात आणि १८ नखे ताब्यात घेतली. अटकेतील आरोपींपैकी राजू कुळमेथे हा संयुक्त वन व्यवस्थापन समितीचा अध्यक्ष आहे. ताराचंद नेवारे हा पीआरटी सदस्य आहे. वाघाच्या शिकार प्रकरणात आणखी काही जणांना अटक होण्याची शक्यता वनविभागाने व्यक्त केली आहे.