चंद्रपूर : गोसीखुर्द धरणाचे ३३ दरवाजे उघडण्यात आल्याने वैनगंगा नदीला आलेल्या पुरामुळे जिल्ह्यातील ब्रह्मपुरी, सावली, मूल या तालुक्‍यांतील अनेक गावांत पाणी शिरले आहे. या गावांतील नागरिकांच्या घरांचे, शेतपिकांचे मोठ्या प्रमाणावर नुकसान झाले आहे.

ब्रह्मपुरी तालुक्‍यातील वैनगंगा नदीकाठावरील लाडज, बेलगाव, कोलारी, भालेश्‍वर, अहेरनवरगाव, पिंपळगाव, चिखलगाव, रणमोचन, खरकाडा, बरडकिन्ही, चिचगाव आणि बेटाळा ही गावे पुराच्या पाण्याने वेढली आहेत. या गावांतील तीन हजार १५६ नागरिकांना आतापर्यंत सुरक्षित ठिकाणी हलविण्यात आले आहे. पुरग्रस्तांना गावाबाहेर काढण्यासाठी नव्याने तेरा बोटी मागविण्यात आल्या आहेत. जिल्ह्याचे पालकमंत्री विजय वडेट्टीवार पूरस्थितीवर लक्ष ठेवून आहेत.

गोसीखुर्द धरणाचे दरवाजे उघडण्यात आल्याने पुराची स्थिती निर्माण झाली आहे. याचा सर्वात जास्त फटका ब्रह्मपुरी तालुक्‍याला बसला. तालुक्‍यातील लाडज, बेलगाव, कोलारी, भालेश्‍वर, अहेरनवरगाव, पिंपळगाव, चिखलगाव, रणमोचन, खरकाडा यासह अन्य गावांत शनिवारपासून पाणी शिरायला लागले होते. रविवारी ही गावे पूर्णपणे पाण्याखाली आली. वायूदलाचे हेलीकॉप्टर मागवून नागरिकांना सुरक्षित स्थळी हलविण्याचे काम सुरू झाले. सोमवारपर्यंत तीन हजार १५९ नागरिकांना सुरक्षितस्थळी हलविण्यात आले.

राज्य आपत्ती व्यवस्थापनाच्या तीन टीमच्या माध्यमातून बचावकार्य सुरू आहे. सोबतच राष्ट्रीय आपत्ती व्यवस्थापनाची चार पथकेही दाखल झाली आहेत. सध्या प्रशासनाने तेरा बोटी मागविल्या आहेत. आणखी वीस बोटींची मागणी करण्यात आली आहे. निर्वासितांसाठी चार ठिकाणी छावण्या उभारण्यात आल्या आहेत. सध्या पाण्याचा विसर्ग कमी झाला असून, काही तासांत पाण्याची पातळी कमी होण्यास सुरुवात होईल, असे प्रशासनाकडून सांगण्यात आले आहे. सावली आणि मूल तालुक्‍यांतील काही गावांनाही पुराचा फटका बसला आहे. मूल तालुक्‍यातील कोरंबी हे गाव पूर्णपणे पुराच्या पाण्याने वेढले आहे. नागरिकांच्या घरातील साहित्याचे व शेतपिकांचे मोठ्या प्रमाणावर नुकसान झाले आहे.

संपादन -स्वाती हुद्दार