पुसद (जि. यवतमाळ) :  तालुक्‍यातील धनसळ, वळसद, काकडदाती येथे सुरू असलेल्या वीटभट्टीसाठी वनविभागाच्या धनसळ-मनसळ जंगलातील लाल मातीची तस्करी करण्यात येत असल्याची तक्रार वरिष्ठांकडे करण्यात आली होती. त्यानंतर शेंबाळपिंपरी वनपरिक्षेत्राधिकारी सचिन सावंत यांनी तातडीने कारवाई करून वनविभागाच्या लाल मातीसह ट्रॅक्‍टर जप्त करण्यात आला. या कारवाईने वीटभट्टीमालकांचे धाबे दणाणले आहेत.

हेही वाचा -  मानसिक त्रास असताना तिला दूर का लोटले? शीतल यांच्या सासूचे आमटे कुटुंबीयांना पत्र

वनपरिक्षेत्र अधिकारी सचिन सावंत यांनी केलेल्या कारवाईत धनसळ येथील शेख चांद शेख इब्राहिम यांच्या वीटभट्टीवर त्यांचा मुलगा शेख नसरूल्लाह हा ट्रॅक्‍टरने (क्रमांक एम एच-29 व्ही 4088) वनविभागाची लाल माती भरून नेताना सोमवारी मध्यरात्री छापा टाकण्यात आला. या कारवाईमुळे वनविभागाच्या मातीची होत असलेली तस्कर स्पष्ट झाली. धनसळ येथील एका जागरूक नागरिकाने वनविभागाच्या जंगलातून लालमातीची होत असलेली चोरी व त्यामुळेच जंगल विभागाचे व पर्यायाने पर्यावरणाचे होणारे नुकसान याबाबत उपवनसंरक्षक, मुख्य वनसंरक्षक व प्रधान सचिव वनविभाग यांच्याकडे मेलद्वारे तक्रारी नोंदविल्या. धनसळ परिसरातील धनसळ, वळसद व काकडदाती येथील वीटभट्टी यांसाठी ही वनविभागाची लाल माती कुठलीही परवानगी न घेता वापरण्यात येत होती. शेतातील मातीचा परवाना घ्यायचा व लाल माती मात्र, जंगल विभागाची वापरायची, असा हा गैरप्रकार गेल्या अनेक वर्षांपासून सुरू आहे. मात्र, वनविभागाचे त्याकडे अजिबात लक्ष नव्हते. 

हेही वाचा -  मानसिक रुग्णांमध्ये वाढ, पण मानसोपचार तज्ज्ञांची संख्या कमी

वन विभागातील माती वीटभट्टीसाठी उकरून काढल्याने वनविभागाच्या जमिनीवरील खडक उघडा पडला असून, मोठे खड्डे तयार झाले आहेत. मातीच उकरून नेल्याने या जंगलात वनस्पती उगवणे कठीण होऊन बसले. त्यामुळे वनविभागाची मोठी हानी होत आहे. दुसरीकडे पर्यावरणाचा ऱ्हास होत आहे. अशास्थितीत एका सजग नागरिकाच्या तक्रारींमुळे वनविभागपुरता खडबडून जागा झाला आहे. या तक्रारीमुळे वनविभागाची होत असलेली फसवणूक उघडकीस आली.

हेही वाचा - अमरावती शिक्षक मतदारसंघ निवडणूक : मतदानाचा टक्का वाढला, कोण ठरणार शिक्षकांच्या पसंतीचा उमेदवार?

अन्‌ तस्करीचे बिंग फुटले! -
वनविभागातील लाल माती ही विटा तयार करण्यासाठी अतिशय उपयुक्त आहे. शिवाय ती चोरी करून मिळत असल्याने वीटभट्टीमालकांचे चांगलेच फावलेले होते. हा गैरप्रकार अनेक वर्षांपासून सुरू असल्याचे निदर्शनास आल्यानंतर एकाच सजग नागरिकाने तक्रार केल्यानंतर लाल मातीच्या तस्करीचे बिंग फुटले. वनपरिक्षेत्राधिकारी सचिन सावंत व त्यांच्या वनविभागाच्या कर्मचाऱ्यांनी दोन रात्र जागून काढत सोमवारच्या मध्यरात्री ही कारवाई केली. जप्त केलेला ट्रॅक्‍टर नागापूर डेपोला जमा करण्यात आला असून, अधिक तपास सुरू असल्याचे वनविभागातील सूत्रांनी सांगितले. चौकशीनंतर वनविभागाच्या जमिनीमधून किती माती चोरून नेण्यात आली, ही बाब स्पष्ट होईल.