चंद्रपूर : महिलांच्या सामाजिक व आर्थिक विकासाला दिशा देणारे उमेद अर्थात महाराष्ट्र राज्य ग्रामीण जीवनोन्नती अभियान आता बाह्य संस्थेकडे वर्ग करण्याच्या हालचाली सुरू झाल्या आहेत. त्यामुळे अभियानाशी जोडलेल्या ५० लाख महिलांचा मार्ग खरतड झाला आहे. शासनाकडून मिळणारा निधी ठप्प झाला असून, संस्था मोडकळीस येण्याची भीती निर्माण झाली आहे. महिलांच्या संस्था वाचवून महिलांना मार्गदर्शन करणारे हे अभियान निरंतर सुरू राहावे या मागणीसाठी १२ ऑक्‍टोबर रोजी उमेदच्या महिला रस्त्यावर उतरणार आहेत. महिला मूकमोर्चा काढून शासनाला जाब विचारणार आहेत.

उमेद अभियानातून जवळपास पाच लाख बचतगट, ग्रामसंघ व प्रभाग संघ राज्यभर उभे झाले आहेत. यात ५० लाखांपेक्षा जास्त महिला जोडल्या गेल्या आहेत. या महिलांच्या आर्थिक व सामाजिक विकासासाठी, त्यातून त्यांना शाश्‍वत उपजीविका निर्माण करून देण्यासाठी अभियानाने समर्पित कर्मचारी व अधिकारी भरती केली.

तीन हजार कर्मचारी या महिलांसाठी अहोरात्र झटत आहेत. उमेदच्या विविध संस्थांना १४०० कोटीपेक्षा जास्त निधी देऊन राज्य व केंद्र शासनाने महिलांच्या जीवनोन्नतीसाठी प्रयत्न केले आहेत. आता हजारो महिला स्वतःची विविध उत्पादने निर्माण करून व्यवसायाची कास धरून आत्मनिर्भर होत आहे. मात्र, त्यांच्या प्रगतीला नवी दिशा मिळण्याऐवजी सरकार अभियानाच्या मुळावर घाव घालत आहे.

सविस्तर वाचा - शंभर गावात राबविणार स्वच्छता साक्षरता अभियान; ५ हजार लोकांपर्यंत पोहचण्याचे लक्ष

या अभियानातील कर्मचाऱ्यांना कार्यमुक्त करण्याच्या सूचना देण्यात आल्या आहेत. या प्रकारामुळे मोठ्या मेहनतीने उभ्या झालेल्या महिलांच्या संस्था मोडकळीस येण्याची भीती व्यक्त करण्यात येत आहे. दरम्यान, महिलांनी अभियान वाचविण्यासाठी पुढाकार घेतला आहे. १२ ऑक्‍टोबर रोजी राज्यभर मूकमोर्चा काढून शासनाचे लक्ष वेधून घेतले जाणार आहे.

संपादन - स्वाती हुद्दार