कोरची (जि. गडचिरोली) : कोरची तालुका मुख्यालयापासून २ किलोमीटर अंतरावर असलेल्या कोचीनारा येथील रहिवासी प्रितराम धकाते (वय ५५) याने रविवार (ता. २) सकाळी ११ वाजताच्या सुमारास जंगलात लाकूड तोडायला गेलेली त्याची पत्नी रेखाबाई धकाते (वय ५०)  हिच्यावर कुऱ्हाडीने वार  करून तिला ठार केले.

आरोपी प्रितराम धकाते याने त्याची पत्नी रेखाबाई हिच्या डोक्यावर व पाठीवर कुऱ्हाडीने वार केले. मदतीसाठी गेलेली मुलीगी श्यामबाई देवांगन (वय ३०) हिच्यावरसुद्धा त्याने हल्ला केल्यामुळे तिचा हाथ फ्रॅक्चर झाला व पाठीलासुद्धा मार लागला.

लगेच मुलीने गावाकडे मदतीसाठी धाव घेतली व जंगला नजीक असलेल्या घरातून मोबाईलने आपल्या पतीला संपर्क केला. जावयाने घटनास्थळी जाऊन आपल्या सासूला दुचाकीने ग्रामीण रुग्णालयात दाखल केले.

परंतु काही वेळाने रेखाबाईची प्राणज्योत मालवली. प्राप्त माहितीनुसार सकाळी श्यामबाई व रेखाबाई गावातील २ महिलांसोबत जंगलात जळावू लाकूड आणण्याकरिता गेले होते. मनात पूर्वीपासूनच राग धरून असलेल्या प्रितरामने आपल्या पत्नीचा पाठलाग करत जंगलातच तिच्यावर कुऱ्हाडीने डोक्यावर व पाठीवर वार करून गंभीर जखमी केले.

यापूर्वीसुद्धा प्रितराम आपल्या परिवारातील सदस्यांना जीवे मारण्याची धमकी देत होता व त्याची लेखी तक्रारसुद्धा कोरची पोलिस स्टेशन येथे करण्यात आली होती. काही दिवसांपूर्वी प्रितराम धकातेने आपल्या पत्नीला मारण्याकरिता सब्बल (लोखंडी सळाख) उचलली होती.

त्याची तक्रारसुद्धा पोलिस स्टेशन येथे करण्यात आली होती. मागील काही महिन्यांपासून प्रितराम आपल्या परिवारातील सदस्यांना धमकी देत होता. नेहमी दारू पिऊन शिविगाळ करत होता. पुढील चौकशी कोरची पोलिस स्टेशनकडून करण्यात येत आहे. आरोपीचा शोध घेण्यात येत असल्याची माहिती सहायक पोलिस निरीक्षक गणेश फुलकुवर यांनी दिली.