गडचिरोली - जिल्ह्याच्या चामोर्शी तालुक्यातील आष्टी येथे घरगुती भांडणावरून पतीनेच आपल्या पत्नीची हत्या केल्याची घटना रविवार (ता. २४) सकाळच्या सुमारास उघडकीस आली. विशेष म्हणजे पत्नीची हत्या केल्यानंतर पतीने पाेलिसांपुढे शरणागती पत्करली. मृत महिलेचे नाव विद्या देविदास चौथाले ( वय २४), रा आष्टी, ता. चामोर्शी, जि. गडचिरोली असे असून आराेपी पतीचे नाव देविदास पुंजाराम चौथाले (वय २६) रा. आष्टी, ता. चामोर्शी, जि. गडचिरोली, असे आहे.

प्राप्त माहितीनुसार आष्टी येथील देविदास चौथाले याचा आंतरजातीय विवाह दोन वर्षांपूर्वी एटापल्ली तालुक्यातील हालेवारा येथील विद्या नरोटे हिच्याशी दोन वर्षांपूर्वी झाला होता. पती-पत्नीच्या घरगुती भांडणावरून ही हत्या झाल्याचे प्राथमिक तपासातून पुढे आले आहे. आरोपी देवीदासने पत्नीच्या डोक्यात लोखंडी रॉड मारून तिची हत्या केली. त्यानंतर स्वतः आष्टी पोलिस ठाण्यात हजर होऊन त्याने हत्येची कबुली दिली. आरोपी अटकेत असून पोलिस घटनास्थळी दाखल झाले. पोलिसांनी घटनास्थळी पंचनामा करून मृतदेह शवविच्छेदनासाठी पाठविला आहे. या घटनेची माहिती जाणून घेतली असता आरोपी पतीने घरगुती भांडणावरून रागाच्या भरात पत्नीची हत्या केल्याची कबुली दिली असल्याची माहिती सूत्रांनी दिली आहे. पुढील तपास आष्टी पोलीस ठाण्याचे ठाणेदार कुंदन गावडे यांच्या मार्गदर्शनात पोलिस उपनिरीक्षक गणेश जंगले यांच्या तपासी पथकाकडून सुरू आहे. या धक्कादायक घटनेने आष्टी परिसरात खळबळ निर्माण झाली आहे.