गडचिरोली : येथील गडचिरोली वनपरीक्षेत्रा अंतर्गत येणाऱ्या मुडझा गावालगतच्या झुडपी जंगलात एका बिबट्याचा मृतदेह रविवार (ता. ३०) आढळून आला. मुडझा गावालगतच्या झुडपी जंगलात कक्ष क्रमांक १६८ मध्ये बिबट्याचा मृतदेह ग्रामस्थांना दिसला. त्यांनी वनविभागाला माहिती दिल्यानंतर वनाधिकारी घटनास्थळी पोहोचले. पशुधन विकास अधिकारी डॉ. बी. ए. रामटेके यांनी मृतदेहाची उत्तरीय तपासणी केली. मृत बिबट्याचे वय अंदाजे दीड ते दोन वर्षे आहे. सहायक वनसंरक्षक एस. बी. भडके, वनपरिक्षेत्र अधिकारी अरविंद पेंदाम यांनी प्राथमिक चौकशी केली असता शरीराचे सर्व अवयव शाबूत असल्याचे दिसून आले. तसेच आजूबाजूला शिकारीबाबतचे कुठलेही ठोस पुरावे आढळले नाहीत. या संपूर्ण कार्यवाहीत मानद वन्यजीव रक्षक मिलिंद उमरे,

वन्यजीव प्रेमी अजय कुकडकर, मुडझाचे पोलिस पाटील लोचन मेश्राम, तुलाराम राऊत, ग्रामपंचायत सदस्य सुरेखा सुरपाम आदी उपस्थित होते. उत्तरीय तपासणीनंतर बिबट्याच्या मृतदेहाला अग्नी देण्यात आला. या घटनेचा तपास उपवनसंरक्षक मिलिश दत्त शर्मा यांच्या मार्गदर्शनात सहायक वनसंरक्षक सोनल भडके व वनपरिक्षेत्र अधिकारी अरविंद पेंदाम करीत आहेत.