पुसद (जि. यवतमाळ) : पत्नीच्या उपचारासाठी आयकॉन हॉस्पिटलमधून निघालेल्या पतीला मंगळवारी (ता.२१) रात्री लुटणाऱ्या चोरट्याला स्थानिक गुन्हा शाखेच्या पोलिसांनी जेरबंद केले व त्याच्याकडून चोरीचा ऐवज जप्त केला. पोलिसांच्या या कामगिरीमुळे नागरिकांमध्ये समाधान व्यक्त होत आहे. पुन्हा शहरात लुटमारीच्या घटना घडू नये, यासाठी पोलिसांनी सतर्क राहावे, अशी अपेक्षा नागरिकांनी व्यक्त केली.

ज्ञानेश्वर नारायण पवार (वय ३८, रा. राजुरा, ता. महागाव) यांनी दिलेल्या तक्रारीनुसार, ते मंगळवारी (ता.२१) आयकॉन हॉस्पिटल पुसद येथे त्यांची पत्नी भरती होती. तिला रक्त्ताची आवश्यकता असल्याने सत्यशांती हॉस्पिटल येथे जाऊन रात्री १०.३० वाजता परत येत असताना हिंदी हायस्कूलजवळ चार अज्ञात व्यक्तींनी त्यांच्या गळ्यावर चाकू लावला. चाकूच्या धाकावर त्यांच्या खिशातील नगदी १५ हजार रोख, सहा हजार रुपये किमतीचा मोबाईल असा एकूण २१ हजार रुपयांचा मुद्देमाल घेऊन पसार झाले. पोलिसांनी गुन्हा नोंद करून आरोपींचा शोध घेतला. पोलिस निरिक्षक उमेश बेसरकर व डी. बी. पथकप्रमुख सहायक पोलिस निरीक्षक नीलेश देशमुख व यांनी लूटमार करणाऱ्यांचा शोध घेतला.

आरोपी पोलिसांच्या ताब्यात

गोपनीय माहितीच्या आधारे संशयित शेख रेहान शेख गुलाब (वय२०, रा. तुकारामबापू वार्ड, ह. मु. वसंतनगर पुसद) याला ताब्यात घेऊन चौकशी केली असता त्याच्याजवळ मोबाईल सापडला. तो मोबाईल ज्ञानेश्‍वर पवार यांचा असल्याची खात्री झाल्याने त्याची कसून चौकशी केली असता त्याने गुन्हा केल्याची कबुली दिली. त्याने दिलेल्या माहितीवरून पोलिसांनी आयान काजी सैफोदिन काजी (वय१९), शेख नोमान शखे रहेमान (वय२२) व शेख अजिम शेख कयुम (वय२०, रा. सर्व वसंतनगर, पुसद) यांना ताब्यात घेतले असता त्यांनी गुन्ह्याची कबुली दिली.